1 N nɛma saxi n ma saden ma kɔɛɛn na,

n kataxi n xanuntenna to feen na,

n na a fenma, koni n mi a toma.

2 Nayi, n kelima nɛn,

n yi taan nabilin,

n yi siga taan yama malandene nun kirane xɔn,

n yi n bɔɲɛn nafan muxun fen.

N na a fenma, koni n mi a toma.

3 Taan kantan muxune yi fa n li,

n yi e maxɔdin, n naxa,

“Ɛ mi n bɔɲɛn nafan muxun toxi ba?”

4 N dangu e ra nɛn tun,

n yi n bɔɲɛn nafan muxun to,

n yi a suxu,

n mi fa a beɲin sɔnɔn,

han n yi sa a raso ngaa banxini,

nga fudi tongo n na dɛnaxan yi.

5 Yerusalɛn sungutunne,

n bata ɛ rakɔlɔ bolene nun burunna xɛnle yi,

ɛ nama xanuntenyaan nakeli,

ɛ nama a raxulun,

benun a waxatin xa a li.

6 Nde ito ra naxan kelima tonbonni,

naxan tema alo tutina,

alo mirihi nun wusulanna xirina,

e nun latikɔnɔnna xiri ɲaxumɛn sifan birin?

7 Sulemani maxali saden nan a ra,

sofa tonge sennin a rabilinxi,

Isirayila sofa kɛndɛne nan e birin na.

8 Silanfanna e birin yii* Silanfanna: Sofane yɛngɛso dɛgɛmana.

e birin darixi yɛngɛn na.

Silanfanna xidixi e birin tagi,

alogo e xa makantanna ti kɔɛɛn na.

9 Manga Sulemani a saden nafalaxi Liban yamanan wudine nan na.

10 A bun tiine rafalaxi wure gbetin nan na,

xɛmaan nan a bundɔxɔn na.

Yerusalɛn sungutunne a dɔxɔ seen nafalaxi

dugi mamiloxin nan na xanuntenyani.

11 Ɛ mini, Siyon taan sungutunne,

ɛ Manga Sulemani nun a manga kɔmɔtin mato

a nga naxan soxi a xun na a ɲaxalandin mati lɔxɔni,

a bɔɲɛn sɛwa lɔxɔna.