1 Techpalehui, TOTECO,

pampa ayecmo aquijme cati nelía mitzneltoquilía.

Ayecmo aquijme masehualme cati quiijtohuaj cati melahuac.

2 Se ica seyoc moistacahuíaj.

Quipiyaj ome inixayac huan quipataj inincamanal.

3 TOTECO quintzontamiltis nochi cati quipiyaj ome inixayac huan cati mohueyimatij quema camanaltij.

4 Quintzontamiltis cati quiijtohuaj:

“San ica tocamanal titatanise.

Sinta tijnequij tiistacatise,

tojuanti tijmatij.

Amo aqui huelis technahuatis.”

5 Pero quej ni quiijtojtoc TOTECO:

“Inijuanti cati teicneltzitzi huan cati amo quipiyaj fuerza nechtzajtzilíaj por nopa fiero masehualme cati quintaijyohuiltíaj.

Yeca ama nimotananas para niquinpalehuis.

Niquinmaquixtis inimaco cati quincualancaitaj.”

6 Nelía temachti cati quiijtohua TOTECO.

Icamanal senquisa melahuac.

Quena, eltoc quej se cuali plata cati quinelicxitijtoque,

huan quipajpactoque miyac huelta hasta senquisa cuali.

7 TOTECO, ta techmocuitahuía.

Techmanahuis para nochipa ica masehualme cati amo cuajcualme quej ama itztoque.

8 Quena, masque mosisinijca masehualme mooquichmajtinemij campa hueli huan nochi masehualme san quipatiitaj cati amo cuali,

Ta techmocuitahuía.