1 Ma TOTECO mitztacaquili quema timotequipachohua.

Ma mitzmanahui nopa Dios cati huejcajquiya quimanahui Jacob.

2 Hasta campa yaya itztoc ipan ichaj,

ma quititani tapalehuili cati quisa ten altepet Jerusalén.

3 Ma quielnamiqui nochi motacajcahualis cati tijmacatoc.

Ma moilhui ten nopa tacajcahualisti cati tijtati iixpa huan cati yaya quiseli ica paquilisti.

4 Ma mitzmaca nopa cati moyolo quinequi.

Ma quichihua ma quisa cuali nochi cati timoilhuijtoc tijchihuas.

5 Quej nopa tojuanti titzajtzise ica paquilisti pampa ta titatantoc,

huan tijtananase banderas ica itoca Toteco Dios pampa mitzpalehuijtoc.

Quena, TOTECO ma mitzmaca nochi cati tijtajtanijtoc.

6 Cuali nijmati para TOTECO nechmaquixtía niitanahuatijca cati nechtapejpenijtoc.

Hasta ten nepa ilhuicac campa nelía tatzejtzeloltic nechhualpalehuijtoc,

huan nechchihua ma nitatani ica ichicahualis.

7 Masehualme ipan sequinoc talme motemachíaj ipan inincarros huan inincahuayojhua para momaquixtise quema onca tatehuilisti.

Pero tojuanti timotemachíaj ipan TOTECO toDios.

8 Inijuanti taijyohuise huan huetzise,

pero tojuanti timotananase huan noja tijpiyase fuerza.

9 Toteco Dios, xijchihua ma nitatani,

na nimotanahuatijca.

Technanquili quema timitznojnotzaj.