1 Ipan tali Babilonia timosehuiyayaj iteno hueyat,

huan timochoquiliyayaj,

pampa tiquelnamiquiyayaj altepet Jerusalén,

huan quenicatza nelía cuali eliyaya.

2 Tiquintahuelcajtoyaj toarpas huan tiquincuapilojtoyaj ipan inimacuayo nopa cuame.

3 Amo hueliyaya tihuicaj.

Pero inijuanti cati techhualicaque ica fuerza ipan inintal,

techtajtanijque ma tihuicaca ica paquilisti nopa cuajcualtzitzi huicat cati tihuicayayaj quema tiitztoyaj ipan altepet Jerusalén.

4 Pero amo tihuelque.

Amo hueli tihuicase se huicat para Toteco ipan seyoc tali ica masehualme cati amo tiquinixmatij.

5 Sinta niquelcahuasquía altepet Jerusalén,

ma quipolo ichicahualis nonejmat,

huan ma ayecmo huelis quitzotzonas nopa arpa.

6 Sinta ayecmo niquicnelisquía Jerusalén cati techpaquilismaca,

xijcahua nonenepil ma tatzqui ipan nocamachal para ayecmo nihuicas.

7 TOTECO, amo xiquelcahua cati nopa tali Edom ehuani quiijtojque,

quema nopa soldados ten tali Babilonia quisosolohuayayaj altepet Jerusalén.

Inijuanti quiijtohuayayaj:

“Xijsosoloca nopa altepet hasta campa tatzquitoc.”

8 Teicneltzi ni tali Babilonia,

pampa nojquiya quisosolose.

Nelía paquis nopa tacat cati quitamisosolos huan quintzontamiltis imasehualhua.

9 ¡Tahuel paquis nopa tacat cati quinitzquis coneme ten Babilonia huan quinxaxamatzas ipan tet,

por cati fiero quichijtoque inintatahua ipan altepet Jerusalén!