19
Den sama fu Masaa Gadu e piisii
fu di Babilon kai
fu di Babilon kai
1 Bakadati, ne mi yee somen sama e takitaki a Masaa Gadu Kondee a tapu anda taki:
“Haleluya*f26*!
Na Masaa Gadu abi ala yeepi. Meke wi gafa Masaa Gadu.
Ne en wawan abi ala makiti.
2 Masaa Gadu e kuutu sani letiopu sondee kukutu fasi.
Bika a sitaafu a gaan motyo
di be e poli a goontapu anga a motyo libi fi en.
Na so Masaa Gadu pai en baka fu den wookoman fi en di a be kii.”
3 We, ne den somen sama bali ete wan pasi taki:
“Haleluya!
Noiti moo a faya di e boon a gaanbigi foto, Babilon o dede. Da a somoko fi en o de fu si fu tego alaten.”
4 Ne den twenti a fo gaansama anga den fo libilibi sani kai anga bee a doti fu gi Masaa Gadu gaandi. Da den e begi en a pe a sidon na a kownu sutuu fi en de taki:
“Amen, na so a de! Haleluya!”
5 Ne mi yee wan Tongo taki komoto na a kownu sutuu anda taki:
“U gi a Gadu fu wi gaandi!
U den sama, di e dini en,
u di e lesipeki en,
pikinwan anga gaanwan.”
A toow fu a Pikin Sikapu
6 Ne, mi yee a tongo fu tyaipi sama. A be gei a balibali fu wan gaan sula anga a balibali fu gaan donduu. Den taki:
“Haleluya!
Bika Masaa, wi Gadu di abi ala makiti e tii now enke kownu.
7 U meke u meke piisii na ala fasi ne en fesi.
Meke u gafa en gi en biginen.
Bika, a dei di a Pikin Sikapu mu toow doo kaba.
Da a uman fi en seeka enseefi, de kaba kaba fu toow anga en tu.
8 Den gi en wan dii weti koosi,
kiin e beenki fu a wei.”
A dii weti koosi ya, na den bun wooko, di den sama fu Masaa Gadu be du.
9 Ne a Engel*f27* de taigi mi taki: “Sikiifi a sani ya taki: ‘Seigi fu den sama di den be kai, fu kon na a toow osu piisii fu a Pikin Sikapu.’ ” Ne a taigi mi tu taki: “Na Masaa Gadu seefi den tuutuu taki ya komoto.”
10 Ne, mi kai anga kini na a futu fu a Engel fu gi en gaandi. Ma a taigi mi taki: “Ná du a sani ya! Mi seefi ya na wan wookoman fu Masaa Gadu enke yu anga den taawan di e tan oli den sani di Masaa Jesesi taki. Na Masaa Gadu i mu gi gaandi. Bika ala den sani di Masaa Jesesi taki, na den sani di a Jeje fu Masaa Gadu be poti a ini den apaiti takiman fi en ati fu den taki.”
A sama di sidon na a weti asi tapu
11 Bakadati, ne mi si wan doo opo a Masaa Gadu Kondee a tapu anda. Ne mi si wan weti asi. Da na Awan di sidon na a asi ya tapu den e kai, Awan di de fu Fitoow. A Tuutuu Wan. Te ai kuutu sama, da ai kuutu anga leti. Te ai feti, da ai feti anga leti tu. 12 En ain de enke faya e leti lelele. A wei tyaipi kownu ati ne en ede. Da a abi wan nen, di sikiifi ne en sikin. Ná wan sama di sabi a nen ya, boiti en wawan. 13 Da, a wei koosi di dipi a ini buulu. Da a nen fi en na, Wowtu fu Masaa Gadu. 14 Den suudati fu Masaa Gadu Kondee de a lo ne en baka na asi tapu. Den be wei dii weti koosi fann. 15 Wan koti fetihow, di saapu a tu se, e komoto ne en mofu. Anga dati a o feti wini den sama, di á de fu Masaa Gadu. Da a o tii den anga wan insii tiki. Da, leti enke fa den e maa doloifi a ini wan baki fu meke win, na letiso a o masi den sama ya, a ini a baki fu a gaan atiboon fu Masaa Gadu, di abi ala makiti. 16 Da wan nen sikiifi ne en koosi anga en bomafutu taki:
GAAN KOWNU FU ALA KOWNU
GAAN MASAA FU ALA MASAA
A meti anga den falisi takiman fi
en lasi a feti
en lasi a feti
17 Ne, mi si wan Engel taampu na a san tapu. Da a bali anga gaan taanga tongo gi ala den sowtu a sowtu foo di e fee a tapu taki: “U ali kon makandii oo! U ali kon makandii na a gaan piisii fesa di Masaa Gadu seeka gi u! 18 U ali kon nyan den meti fu kownu, suudati edeman anga bigiman fu goontapu. U ali kon nyan a meti fu asi anga den sama di be e lei a den tapu anga a meti fu ala den taa sama, den saafu anga den di a ná saafu, pikinwan anga gaanwan.”
19 Ne mi si a meti anga den kownu fu goontapu anga den suudati fu den. Den be ali kon makandii fu feti anga Awan, di be e lei a asi anga den suudati fi en. 20 Ne den kisi a meti anga a falisi takiman. Ne en be wooko gi a fosi meti e du foondoo sani gi a meti. Bika a be koli den sama di be abi a maiki fu a meti, anga den di be e gi a pobiki di gei en gaandi. Ne den fiingi den libilibi go a ini a swampu, di e leti faya e boon enke den iti podoo ne en. 21 Ma, a Sama di be e lei na a asi tapu, kii den taawan anga a fetihow, di be e komoto ne en mofu. Ne ala den foo nyan a meti fu den, te den bee fuu.