Rokap na Fafas ulo Iesu Karisito
Metiu
i siit u
Orek famu
Metiu ae i siit buk igii, i neng lon nenge sangful ini u e kalalik na fafausum ke Iesu. Nenge asa sabin e Liwai. Pakanini i foim la na piklin matanfuntih tina Rom, arae nenge tom kep takiis. Namih, Iesu ka kam pes u ke ka tapiek nenge kalalik na fafausum kia (par Metiu 9:9-13).
Metiu i nenge sikin Iudaia, ma i sisiit usuf fan Iudaia, ae ri nene la isi tapiek ken kaltu ae God in wuun ufu isi in tapiek arae king kiri. Na orek Ibru ri foteng u ini Mesaia, ma na orek Grik ri foteng u ini Karisito.
Metiu i ier le in fas ri le Iesu tom i e Mesaia, king ken fan Iudaia.
I famalal fale orek sabin ae na Buk na Gogoh ae i ususe isi Mesaia. Ke Iesu ka fasuut u mang e foron orek ae.
Nenge tier sabin ae Metiu i ususe isi, e matanfuntih na kukulii, ae Iesu i tel fafausum ini.
Buk ke Metiu i aragii:
1:1—2:23 Iesu i pang
3:1-12 Foim ke Jon Tom tel Bapitaiso
3:13—4:11 Jon i baptais Iesu ke nami Satan ka tof u
4:12—18:35 Foim ke Iesu na Galili
19:1—20:34 Ninla ke Iesu una Ierusalem
21:1—27:66 Farfarop na wik na foim ke Iesu, ke minet kia
28:1-20 Apaptifis ke Iesu
1
Asan foron Tubutamat e Iesu
Luk 3:23-38
1 Igii e asan foron tubutamat e Iesu Karisito kalalik ke Dewit, ma Dewit kalalik ke Abaram:
2 Abaram i e tama Aisak,
Aisak i e tama Jekop.
Jekop i e tama Juda turan foron tualik.
3 Juda i e tama Peres ru e Sera, tinruh e Tamar.
Peres i e tama Esron,
Esron i e tama Ram.
4 Ram i e tama Aminadap,
Aminadap i e tama Nason.
Nason i e tama Salmon.
5 Salmon i e tama Buas, tina e Rahap.
Buas i e tama Obet, tina e Rut.
Obet i e tama Jesi,
6 2King 24:14,15; 2Stori 36:10; Jeremia 27:20ke Jesi i e tama king Dewit.
Dewit i e tama Solomon, tina i antu Uria ta bii.
7 Solomon i e tama Reoboam,
Reoboam i e tama Abia,
Abia i e tama Asa.
8 Asa i e tama Jeosafat,
Jeosafat i e tama Jeoram.
Jeoram i e tama Usia.
9 Usia i e tama Jotam.
Jotam i e tama Ahas.
Ahas i e tama Esekia.
10 Esekia i e tama Manase.
Manase i e tama Amon,
Amon i e tama Josaia,
11 ke Josaia i e tama Jekonia turan foron tualik. Aunbiing ae fan Israel ri ka kamkabet na Babilon.
12 Nami na kamkabet na Babilon:
Jekonia i e tama Sealtiel,
Sealtiel i e tama Serubabel.
13 Serubabel i e tama Abiut.
Abiut i e tama Eliakim.
Eliakim i e tama Asor.
14 Asor i e tama Sadok.
Sadok i e tama Akim.
Akim i e tama Eliut.
15 Eliut i e tama Eleasar.
Eleasar i e tama Matan.
Matan i e tama Jekop,
16 ke Jekop i e tama Josep antu Maria, tina Iesu, Iesu ae ri foteng u ini Mesaia.
17 I sangful ini fet e ulul tipes u lo Abaram ulo Dewit, ke i sangful ini fet, tipes u lo Dewit una aunbiing fan Israel ri kamkabet na Babilon, ke i sangful ini fet tina aunbiing na kamkabet na Babilon una aunbiing Mesaia i pang.
Iesu Karisito i Pang
Luk 2:1-7
18 Luk 1:27Ususe lo Iesu Karisito ae i pang i aragii: Maria, tina Iesu, ri fakale ta u le in telpes Josep, isau le aunbiing biil biitom ru kiis turim, ke ri ka par u le Maria ka tian tah. Tanwa Kalkaluu tom i fatapiek kalalik na bala. 19 Josep antu Maria i nenge tom tortores, pesu biil i to ier isi famatlawen Maria na matan fanu, ka wol le in lin fakum u sau.
20 Isau le aunbiing i wolwol la biitom, ke nenge angelo ke Kumguui ka tapiek sing i na nimnibiil, ke ka tarah, “Josep, kalalik ke Dewit, gong o sokeh isi telpes Maria arae antum, wara le kalalik ae na bala, Tanwa Kalkaluu tom i fatapiek u. 21 Luk 1:31In fang nenge kalalik tamat ma on foteng u ini Iesu, wara le in faliu fanu kia koseng foron sinang laulau kiri.”
22 Foron tier tikii igii i tapiek una fasuut orek ke Kumguui ae profet i use ta u aragii: 23 Aisaia 7:14“Gam ongen u, nenge tah ae biil biitom i borong turan ti kaltu, in tian ke ik fang nenge kalalik ma rik foteng u ini Imanuel.” Kamtinan orek ae le, “God i kiis tura kerer.”
24 Aunbiing Josep ka mat, ka telpes Maria arae antu, arae tom angelo ke Kumguui i fas ta u. 25 Luk 2:21Isau le Josep biil i borong tura papang na aunbiing Maria ka luun kalalik. Ke Josep ka ta asa le Iesu.