6
1b. Emanuelʼgi sunmaklenaid
(6:1–12:6)
Isaías, Bab-Dummad-ologanagi-sii daksad
1 Rey-Uzías-burgwisad-birgagine, ani Isaías, Bab-Dummad ologana-biriginedgi-sii an daksad. E-mola-duku ese-goled-neggi bela batenai an daksad. 2 E-birgine, dule-nibnegginmalad-Serafínʼye-nugmalad gukunanai an daksad. A-dulemar sakan-nergwa (6) nikamaladbiid: Sakan-warbogwadgi e-wagar odukunanaid, sakan-warbogwad-baidgine, e-malimar odukunanaibalid, degine, sakan-warbogwad-baidgindi, gukunanaid. 3 Muchub-muchubbi, binnasuli sognanaid:
“Bab-Jehová-Bela-Gangued-Nikadi, Bab-Jehová-Isligwaledid, Isligwaledid, Isligwaledid.
Bela napneggi e-gangued-yeerdaklegedi neg-gasa naid.”
4 Serafínʼmar-binnasur-gornanaidbali, Bab-Dummadse-goled-neg-yawagak-bargamalad e-sailamarse-bakale, giglimakded, geb Bab-Dummadse-goled-neg bela waa daasa sigisad. 5 Geb an binnasuli goted:
“¡An duledar-wiles! ¡An bergussun!
Ar ande ibmar-isganabi-sogdiid-duled,
dulemar-ibmar-isganabi-sogdimalad-abargi an gudiid.
Emide, an Rey-daksad,
Bab-Jehová-Bela-Gangued-Nikad an daksad.”
Isaíasʼse-gorlesad
6 Degidgine, Serafín-gwensak ansik gukualid. Bab-Dummadga-ibmar-ogumakar-ukleged-ailagi soo-gasiidgi soo-weed-esgorogi sogun-ara-arad-wesadi sedanikid. 7 Geb a-sogungine, an-gakuli ebunonikid, agi anga sogded:
“Be dake, we-sogun-ara-arad be-gakuli-ebusadi, bega isgued elinonisunnad.
Bab-Dummadgi be isgudiidi, emide isgussulidyobi be daklenadsunnad.”
8 Geb degidgine, Bab-Jehová-e-sunmaked an itosad. Weyob soge an itosad:
—¿An doa-dule barmidoe?
¿Doa anmar-anar naoe?
Geb abin an sogded:
—Ani be an-barmide,
ani an naoe.
9 Geb Bab-Jehová anga sogded:
—Be nae, we-dulemarga be sogna:
” ‘Be ibmar nue-itomalo-inigwele, akusunna be itomaloed.
Be ibmar nue-dakmalo-inigwele, akusunna be dakmaloed.’
10 We-dulemar-e-gwage dutusuli be imako,
akusunna ibmar-itogega be imako,
akusunna ibmar-dakega be imako.
Degisulile, e-ibyagwale ibmar-dakdoed,
e-uayagwale ibmar-itodoed,
degi, e-gwagegi magar-ibmar-itodoed,
e-isguedga bukib binsadmaloed.
Degidbali, nudake an dakledagoed.”
11 Geb an ese egichided:
—Bab-Jehová, ¿sanagwadse an be-nuggi sunmakdii gusunnoe?
Bab-Jehová anga sogded:
—Bela neggweburmar-obelolegedse be an-nuggi sunmakdii guoed.
Bela negmar-ollo-ollo-ambikuedse be angi sunmakdii guoed.
Dulemar a-neggweburmargi-bar-gudii-guosulidse be an-nuggi sunmakdii guoed.
Nainumarbela-swiri-naguedse be angi sunmakdii guoed.
12 An bela-dulemar-e-yalagi dikasuli ononnogoedse be angi sunmakdii guoed.
Bela e-yala-olloo-naguedse be an-nuggi sunmakdii guoed.
13 Ar dulemar e-dulataledgi (100) amba e-ambe (10) besale,
bela amba amar berguoed.
Ar sapi-emisgwa-siklesad-e-sailabi gannaa-siidaedyobi wis bemaloed.
Geb we-dulemar-bemaloedi neggwebur-islidikidga guoed.