64
1 Anmar-Bab-Dummadye, bitigi be nibneg egasana gadin,
bitigi be aidealina gadin.
Ar be-abin yarmar giglimakdeled.
2 Be-isdarmalad-abargi be-nug be oyodele,
igi soo sapan-ogader dii-ogwakgwarmakdae,
deyobi, be-abin dulemar-yar-baid-baidgi-bukmaladi gudmalaled,
be-abin wawanmakdemalaled.
3 Be aidenonigu, ibmar-geger-itolemalad, ibmar-gegerdaklemalad, anmar abdakbuksulid be imaksad,
be-asabin yarmar giglimakded.
4 Negasaila-akale, dule-egi-bensurmaladga ibmar-dummagan-imaked dakledisulid,
dule-baid-beyobid gwen itoledisurbalid.
5 Dule-weligwaledgi-igar-innikigwad-imakdiid be abingaed,
be-igarba-nanadimalad be abingabalid.
Ar anmar isgussoggu, be sae-itoded.
Ar anmar dikasurgus isguedginbi gudidimalad.
¿Ar wede anmar sunna abonolede?
6 Ar anmarde bela ibmar-isganayob gumalad.
Bela anmar-igar-inniki-imakedi, siamar-yokor-bisgemalad-e-mor-ebusadyob gued.
Bela anmar gagan-dinguedyob gumalad.
Anmar-isguedi, burwayobi anmar-oseleged.
7 Dule-wargwensaale, be-nug obarsulid,
begi-bendakleged-amiegala gwen gandik-imaksurmarbalid.
A-ulale, be-wagar be anmar-idu odukusad,
degi, anmar-isguedba-berguega be anmar-imaksad.
8 Degi-inigwele, Bab-Jehová, bee be anmar-Babad.
Anmar napsa gumalad.
Bedi napsa-sobedga gued,
bela be anmar-obinnisad.
9 Bab-Jehová, melle be bela-bela sae-itoge.
Melle be degisadegu anmar-isgued ebinsadii gue.
Wis be wile-anmar-dake,
ar anmar bela be-dula gumalad.
10 Be-neggweburmar-islidikmalad nega-dulesulidganga gunonikid.
Siónʼse-bakale, nega-dulesulidganga gunonikid,
Jerusalén-neggwebur ollobi-daarmakarnai gunonikid.
11 Anmar-bese-goled-neg-yeerdakleged-islidikid, bia an-babgan bega namakbukdamala, bela soose gummaksa siid.
Bela anmar-ibmar-bur-nuegan-nikadi, bergusad.
12 Bab-Jehová, weyob-ibmarmar-gusadgine, bede, ¿gwen ibmar akar imakosuli?
Bede, ¿ibmar sogosurde? ¿Binsarsunna be bukib-binsaega anmar-imakode?