7
Binsaed-nikaguedi, ome-negsichigi-nanaedgi be-ollorsaoed
1 Machi, bega-an-ibmar-sogedba be dae,
igargan-an-bega-ukedba be nanae.
2 Igargan-an-bega-ukedba be nanaele, be dula gudiguoed.
Be-ibyagwag be akweyobi, an-bega-ibmar-sogedba be ibsae.
3 An-be-unaedi, olargan-googi-yoiyobi, be sedii sae,
be-gwagegi nue-ebinsadii be imake.
4 Binsaed-nikaguedga be soge: “Be an-bunye.”
Ibmar-wisiguedga be soge: “Be an-ai-nuedye.”
5 Adi, wemar, ome-sui-dikarba-yolediidgi, be-ollor-imakoed,
ome-e-agumakedba-emar-binsaed-gaedgi, be-ollor-imakoed.
Ome-emar-binsaed-gaed, degi, sapingwa-binsaedsulidaed
6 An-neggi, yawagak-bipigwad-imbaba an atakded.
7 An dakalid, sapingana-binsaedsurmalad-abargi, machi-wargwen bur-binsaed-sated gudii.
8 We-sapingwade, igar-abingunaidse warmakdapid,
agi ome-e-sui-dikarba-yolediid-negse naded.
9 Deunni, neg-sedomaid, neg nue-gutuleded,
degi, neg nue-mutikguded.
10 Geb agine, ome e-abin-noalid. Ome gambanuchu-imakedyob mor-yoid.
E-daedi, mag-dakleged, macherganbina sognadapid.
11 We-ome neg-gagadidaed, gwinni-gwinni daed,
geg neggi siged, galimbabi wisid.
12 Galimbaba gudidaed, dulemar-bukidar-ambikuedgi gudidabalid.
Igi-saele machered-wargwen-yardakodibeye binsadidaed.
13 We-ome, sapingwa-daksagua, gadebinne imaksad,
ei wagar usa imaksad.
Ega bingesuli sogded:
14 “Gwenatigwar-guega Bab-Dummadga an ibmar-ukoye an sogsad.
Deyob an sogsadi, emi deyob an imaksad.
15 A-ulale, an be-abin noalid.
An be-amidii gusad,
emide an be-abingunonisunnad.
16 An-gabedgi atue-nued-yeerdakleged, lino-dubgi-sobaled-Egiptoʼgi-danikid an ogichad.
17 An-gabedgi ina-wawadikmalad, mirraʼye-nugad, áloeʼye-nugad, degine, canelaʼye-nugad an eosad.
18 Anba be dage. Anmar nog-gobmai oibodagoed.
Oibogedse anmar nog-gobmai imakmaloed.
19 Ar an-sui neggi gudisulid,
dikasuli neggwebur-baidse naded.
20 Mani-ichesuli sesa-naded,
geb nii-dalu-naidse gannar negse aibiroed.”
Sapingwa ome-ega-agumakedgi binsaed-galesad
21 Weyobi, ome, agumaksadgi,
machigwa-binsaed-gasad.
22 Moli-alugwasualedi, e-oburgwilegedse ebipilemaiyobi, machigwa ome-sorba-nai nadapid.
Goe-sapur galesgunaidgi sigu egi yolenonikiyobi, machigwa gued.
23 Igi nuu burgwed-wissuli saki-naidse naddae,
machigwa deyobi gued.
Ome-emar-binsaed-gaedgi banguo, degisulile, be burgoed
24 Machi, emigi nue be an-itoge,
an-be-unaed nue-itosii be imake.
25 Melle a-omegi-binsadii be sae,
melle a-omese be binsaed galege.
26 Ar a-omese bukidar machergan yardaklediid.
Machergan-bukidargus ese burgwedanikid.
27 We-ome-negse be nadele, be burgoed.
A-igar burgwedse dule-semaid.