149
Bab-Jehová-nug ogannomar
1 ¡Aleluya! ¡Bab-Jehová-nug odummolesun!
Bab-Jehováʼga namaked-binid namakmala.
Bab-Jehová-sordamar-abargi Bab-Jehová-nug odummomala.
2 Israel-dulemar, dule-bega-burba-uksadgi be wergumala,
Israel-dulemar Sión-yargi-bukmalad, be-e-Reygi be wergumala.
3 Nue-weligwaledgi-dodonai,
Bab-Dummad-e-nug ogannomala.
Gar-pandero-ogornai ega be namakmala.
Gar-arpa-ogornai ega be namakmala.
4 Ar Bab-Jehová e-dulemargi yeer itodaed.
Dule-wiledimaladi e-isdarmaladgi-nakwega imakdaed.
5 Bab-Dummad-sordagan na be emargi-obichamaladgi, wergumala.
Gachigi amba be maile, namakmai be imakmala.
6 Be-gammu-galagi Bab-Dummad-nug odummomala.
Be-argangi es-suid-nugar-darbogwad-gani Bab-Dummad-nug odummomala:
7 Adi, dulemar-baigan buged-mai be imakmalaga,
dulamar-baigan sabsur-odurdakega,
8 esgoro-dubgi e-reymar-edinnega,
esgoro-dubgi e-dummagan-edinnegar.
9 Adi, Bab-Dummad, dulemar-sabsur-odurdakoye-sogsadba imaklegegar.
Weyob gunonikile, bela bemar Bab-Dummad-sorda-gumaladi egi be wergumaloed.
¡Aleluya! ¡Anmar-Bab-Jehová-nug ogannomar!