12
1 अस्के येसु ओरतोनि उंदि कता वेहमळ सुरु कीतोर, “वरोर मनकल उंदि अंगुर्कना तोटा कीतोर. आ तोटा सुट्टु गूरे दोहाचि तोटाता लोप्पेन अंगुर पंडिना पानकम तेंडालय उंदि पोक्का तवतोर. आनि दाना दग्गेरेने तोटाता कावेलहाटीं उंदि मंडा वाटतोर. पजा वेरेतोर्कुंक बटाइते हीसि, ओर इंकुंदि देसेम पेय्सि होत्तोर. 2 पजा बस्के अय्ते अंगुर पंडिं कोयाना वेला वाता, अस्के ओरागटाल पंडिना तूस एतालय ओना वरोर जीतागान बटाइतोरेके लोहतोर. 3 गानि बटाइतुर आ जीतागान पीसि पक्का तंतुर आनि उत्ता कयकुने वापस लोहतुर. 4 पजा मालक इंकावरोन जीतागान बटाइतोरेके लोहतोर. ओर बटाइतुर ओना तल्ला पयाह्तुर आनि ओन कदर हिलाकुंटा कीसि लोहतुर. 5 मालक मर्रा इंकावरोन जीतागान ओरेके लोहतोर, ओर ओन हव्कतुर. अस्के मालक इल्हा इंका वेल्लेन जीतागाह्कुन लोहतोर. गानि बटाइतुर ओरंटेताल इच्चुर्कुन तंतुर, इच्चुर्कुन बारे हव्कतुर. 6 आकिरते मालकनगा ओना पावरमगल्ला मर्रि वरोरे मिगिलसि मत्तोर. अस्के मालक, ‘नावा मर्रिन बेस कदर कियानुर’ इनकुंचि ओरेके लोहतोर. 7 गानि बटाइतुर ओर वायानद हूळसि, ‘ईर अय्ते वारसदार आंदुर. ताकट, ईन मनम हव्ककोम, अस्के इद तोटा मनाकु आंता’ इंचि वरोंक-वरोर इत्तुर. 8 अस्के ओर ओन पीसि हव्कतुर आनि तोटाता पलाते ओसि पोहचितुर, इल्हा इंचि येसु कतातुन महतोर. 9 महता पजा इल्हा इत्तोर, इंदके अंगुर तोटाता मालक वासि बतल कियानुर इंचि इनकुंतिट? ओर वासि बटाइते कियानोर्कुन अंटोर्कुन हव्कानुर आनि अद तोटातुन वेरेतोर्क अप्पजेपानुर,” इल्हा वेहचि,
10-11 “बद बंडातुन अय्ते मिस्त्रिकु कबळ्क वायो इंचि हय्सा हिल्लुर,
अदे बंडा, सेंकु मूलाता पुनादि बंडा आता.
इद सामि कीता कबळ आंद,
इद मनम नदरते इचंत्रमाता कबळ आंद, इल्हा दर्मसास्त्रमते रासि मंता, मिमेट हदवा हिल्लिरा?” इंचि इत्तोर.
12 दर्मसास्त्रम कराहना गुरुल्क आनि पेर्मलोर्क, येसु वेहतद कता केंजसि, “ईर माकुने इंचेके मंतोर,” इंचि तेल्पिच्कुत्तुर. अदुनहाटीं ओर येसुन पियालय हूळतुर. गानि लोकुल्कुना वेर्रेक ओन पियाकेने होळसि होत्तुर.
कैसर राजांक कर दोहना बारेमते
13 पजा, ओर वळ्कानेंके ओना पोल्लेना लोपोने दोर्का पिय्याना इंचि इच्चुर परिसिल्कुन आनि इच्चुर हेरोद राजाना मनकलोर्कुन ओर येसुनगा लोहतुर. 14 ओर येसुनगा वासि, “गुरु! निमे सत्तेमंतुन आंदिन, पेनदा हर्रि हूप्सानोन आंदिन, बोर बतल इनना गानि दाना पिकिरगुडा कियिन, निमे लोकुल्कुना मोकम हूळसि वळ्किन आनि पेनदा हर्दा बारेमते सत्तेमते कराहंतिन इंचि माकु एरपाटे मंता. इंदके माकु वेहा, कैसर राजांक कर दोहमळ न्यायमेना, आयोना? मोमोट कर दोहकोमा दोहामन्निआ,” इंचि पूसकीतुर. 15 येसु ओरा मनसुना कराब पिलान एरपाट कीसि, “नाकुन प्पुने पियालय बारि परिक्सा एतसंतिर? नाहेके उंदि एंडि बिल्ला तच्चि हीम्टु नना हूळंतन,” इंचि इत्तोर.
16 ओर उंदि एंडि बिल्ला पीसि वातुर. अस्के येसु ओर्कुन, “इद बंडि पोर्रो बोना पोटो आनि पोर्रोल मंता?” इंचि पूसकीतोर. “कैसर राजानद” इंचि ओर जवाब हीतुर. 17 पजा येसु ओर्कुन, “बद कैसर राजानद मंता, अद कैसर राजांक हीम्टु आनि बद पेनदाद मंता, अद पेनदुक हीम्टु,” इंचि इत्तोर. ओर ओनपोर्रो वेल्लेने इचंत्रम आतुर.
सदुकिरकु येसुन पसांचालय हूळंतुर
18 इच्चुर सदुकिर येसुनगा वासि इल्हा पूसकियालय दल्गतुर. (सदुकिर्क इनानोर हातोर मर्रा जीवाते तेदुर इंचि इनुंदुर.) 19 “गुरु! मूसाना नियम परकारम, वरोर मनकल पिलाल्क आयाका मुन्नेने हासि होंचि ओना मुत्तो मत्ते, दानातोनि ओना तम्मुर मर्मिं आसि, हातोना वंसमताहाटीं पिलाल्क कनना इंचि रासि मंता. 20 अय्ते, उंदगा एडुर दादल-तम्मुह्क मत्तुर. ओरगाटाल पेद्दा दादल मर्मिं आतोर, गानि पिलाल्क आयाकेने हासोत्तोर. 21 हातस्के ओना पज्जोटोर दानतोनि मर्मिं आतोर, ओरगुडा पिलाल्क आयाकेने हातोर. अल्हेने ओना पज्जोटोरगुडा दानतोनि मर्मिं आतोर, ओरगुडा पिलाल्क आयाकेने हातोर. 22 इल्हा ओर एडुरगुडा दानतोनि मर्मिं आसि पिलाल्क आयाकेने हातुर. आकिरते अद मुर्तळगुडा हाता. 23 अय्ते ओर हातुर मर्रा जीवाते तेदता पजा अद बोना मुत्तो आयार? बारित्ते अदुन ओर एडुरगुडा मर्मिं आसि मत्तुर,” इंचि पूसकीतुर.
24 अस्के येसु ओर्कुन, “मिमेट दर्मसास्त्रमतुन आनि पेनदा ताकततुन एरपाट कियाका तप्पु अर्तम कीकुंचंतिर. 25 बारित्ते हातोर मल्सि जीवा अर्रानुर अस्के, ओर मरमिं आयुर, आनि मरमिं कीसि इंका हिय्युर. गानि ओर स्वर्गमता पेनदा दूतन लेसीं मनांतुर. 26 हातुर मर्रा जीवाते अर्राना बारेमते, दर्मसास्त्रमते पोत्तना पोद्दाता गटना जर्गनेंके पेन, ‘नना अब्राहामुना पेनदुन, इसाकुना पेनदुन आनि याकोबुना पेनदुन’ इंचि मूसांक वेहता, अदुन मिमेट हद्वा हिल्लिरा? 27 अद हातुरा पेन आयो गानि जीवाते मत्तुरा पेन आंद. मिमेट वेल्ले तप्पु कीसेक मंतिट,” इंचि इत्तोर.
अन्निंकना पेद्दा आदेस
28 ओर वादविवाद कीसेके मत्तद केंजसि, अच्चोटेने वरोर दर्मसास्त्रम कराहना गुरु अगा वातोर. येसु ओर्क बेस जवाब हीतद हूळसि, ओर वाद-विवाद कियानद केंजसि, “गुरु, पेन हीता आदेसकुनाल मेन आदेस बद?” इंचि पूसकीतोर. 29 येसु ओन्कु जवाब हीतोर, “ए इस्राएल! इद केंजा, अन्नि आदेसुकुनाल इद मेन आदेस आंद. मावा पेने सामि आंदुर. 30 नीवा सामि आता पेनदुन निमे पूरा मनसुनाल, पूरा आत्माताल, पूरा बुद्दिताल आनि पूरा ताकतताल पावरम कीम. 31 रोंडोदि आदेस बद इत्ते, निवद निमे बच्चोन पावरम कीकुंतिनो, अचोने नीवा लोता पक्कातोन पोर्रोगुडा पावरम कीम. इवुंकन्ना पेद्दा आदेस्क इंका बवे हिल्लें,” इंचि वेहतोर. 32 अस्के दर्मसास्त्रम कराहना गुरु येसुन, “गुरु, निमे बरोबर वळ्कतिन. पेन उंदे आंद, दांक तपिच्चि इंकुंदि पेन हिल्ले. 33 मोमोट दर्मम कियानदानकन्ना, मोक्कु हियनदानकन्ना मावा पूरा मनसुनाल, पूरा आत्माताल, पूरा बुद्दिताल आनि पूरा ताकतताल इंकावरोन पावरम कियमळे बेस आंद,” इंचि इत्तोर. 34 अल्हा ओर तेल्विते वेहतद केंजसि येसु ओन, “निमे पेनदा राज्येमकु लक्कु हिल्लिन,” इंचि इत्तोर. दाना पजा येसुन इंका बदे पोल्ले तल्कालय बोनके दैरनेम आया हिल्ले.
किरिस्तु बोना मर्रि आंदुर?
35 येसु गुळिते पेनदा पोल्लें कराहनेंके, “किरिस्तु दाविदना मर्रि आंदुर, इंचि दर्मसास्त्रम कराहना गुरुल्क बारि इंतुर?” इंचि येसु पूसकीतोर. 36 इद पोल्लेतुन कुद दाविद पवित्र आत्माते निंडिस,
“सामि नावा सामिन,
‘बच्चोरदाका पगातोर्कुन नीवा काल्कुनगा तायोन,
अच्चोरदाका नावा तिना बाजुंक उद्दिस मन,’ इल्हा इत्तोर.
37 दाविद ओन नावा सामि इंचि इत्तोर. अय्ते किरिस्तु दाविदना मर्रि बल्हा आंतोर?” इंचि पूसकीतोर. अगा गुळिते मत्ता लोकुल्क येसुना पोल्लें बच्चोरो गम्मतते केंजतुर.
दर्मसास्त्रम कराहना गुरुल्कुनालेसिं किया मनि
38 येसु ओर्क कराहनेंके, “दर्मसास्त्रम कराहना गुरुल्कुना बारेमते उसारते मंटु. ओर पोर्रोटाल हिळुदाका पोळ्गु अंगिं केर्सि हाटुमते तिरियमळ आनि लोकुल्क ओर्कुन नमस्कार कियमळ ओर्क बेस अनपिचंता. 39 इंका दर्मसास्त्रम कराहना लोह्कुनगा ओर्क उद्दालय मुन्नेटा कुर्सिं गावाले, गाटो तिनानगागुडा पेद्दाल्क उद्दाना कुर्सिनगा उद्दालय हूळंतुर. 40 ईर मुंडामोस्ता मुर्ताह्कुन मुळहांतुर, लोकुल्कुंक हूप्सालय वेल्लेनजेम पारतना कींतुर. गानि ईर्क मात्रम अंटोर्कन्ना एक्को पेन सिक्सा हियार,” इंचि इत्तोर.
मुंडामोस्ता मुर्तळ रोंडु कोत्तां वाटमळ
41 येसु गुळिते दान पेटिता मुन्ने उद्दिस, लोकुल्क कोत्तां वाटनद हूळसेक मत्तोर. वेल्लेटुर सिरमंत लोकुल्क वेल्लेने कोत्तां वाटतुर. 42 पजा मुंडामोस्तद उंदि गरिब मुर्तळ वासि रोंडु रागि कोत्तां वाटता. अवुना विल्वा वेल्ले तक्को मत्ता. 43-44 अस्के येसु ओना सिस्युल्कुन दग्गेरे केय्सि, “नना मीक निजम वेहासेक मंतन, इद गरीब मुंडामोस्ता मुर्तळ अंटुर्कन्ना एक्को वाटता. बारित्ते इगे सिरमंत लोकुल्क ओरा वेल्ले दनमताल इच्चुंगे कोत्तां दान पेटिते वाटतुर, गानि इद गरिब मुंडामोस्ता मुर्तटगा रोंडे रागि कोत्तां मत्तां. अद अवुनगुडा, बल्हा पिस्कन, बतल तिनकन इंचि विचारम कियाका पेटिते वाटसीता,” इंचि वेहतोर.