8
Kuyie nkpeńnìmɛ̀ kɛ dɔ̀ɔ̀ onìtì kòò dɛu
1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ kubómbonku.
2 Ti Yiɛ̀ nKuyie nhɑ yètìrì feímu
kɛtenkɛ̀ kɛmɔu miɛkɛ.
A yètìrì dɛumu kɛ sèńtɛ́ tiwɛtì,
n yó ndɑ sɑ̃ntímu.
3 Ibí nɛ̀ ibíbɛ́nní bo ndiè nkɛ dɑ sɑntí,
iì kó yɛnɔ̀ peri ɑ dùɔ̀ntɔbɛ̀ diɛbɛ̀,
ɑ dootitɔbɛ̀ diɛbɛ̀ í piɛti tinɑ́ɑǹtì.
4 Kɛ̀ n wùó nkɛĩ́nkɛ̀ ɑ nɔu kó mutɔ̃mmú,
otɑ̃̀nkù nɛ̀ siwɑ̃̀ɑ̃ ɑ dɔ̀ɔ̀ dɛ̀,
5 m bɑ́ɑ́ yɑ̀ onìtì tu wè kɑ̀ɑ yɛ̃́ o kpɛ́í,
n yí yɑ̀ onìtì yie ntu wè kɑ̀ɑ dɑ̀kɛ o kpɛ́í.
6 Kuyie nhɑ ò dɔ̀ɔ̀ kòò sɑ̃kɛ dònnɛ̀ fɔ̃́ nwe,
kɑ̀ɑ ò duɔ́ ntikpetì nɛ̀ diyetìdiɛrì.
7 Koò duɔ́ nhɑ dɔ̀ɔ̀ dɛ̀ɛ̀ kó dimɑ̀ɑ̀ kòò dɛ̀ bɑkɛ́,
kɑ̀ɑ ò bɑɑ́ ndɛmɔu.
8 Tipìètì nɛ̀ inɑ̀ɑ̀kɛ nɛ̀ tikpɑsĩ̀ntòo,
9 nɛ̀ sinɔɔ nɛ̀ siyĩĩ
nɛ̀ dɛ̀ɛ̀ kó dimɑ̀ɑ̀ bo mɛniɛ mmiɛkɛ.
10 Ti Yiɛ̀ nKuyie nhɑ yètìrì feímu
kɛtenkɛ̀ kɛmɔu miɛkɛ.