51
Dɑfiti bɑ̀ɑ́mmɛ̀ Kuyie nho yɛi ncĩ́ɛ̃́mmɛ̀ kpɛ́í
1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀. 2 Dɑfiti duɔ́nɛ̀ Bɑtisebɑɑ kɛ̀ Nɑtɑ̃ɑ̃ wèè nɑ̀ɑ́ nKuyie mpɑ̃ɑ̃nɑ́ɑǹtìi kɔtɛ kóò yɑ̀ koò dentɛ̀ fɛ̀.
3 Áú Kuyie! N kuɔ́ mmɛsémmɛ̀ ɑ sɑ̀ɑ̀ nkpɛ́í,
ɑ sémmɛ̀ dɛumu, ũtɛ́ n yɛi.
4 Nh ɔ́útɛ́ pɑ́íí kɛ́ n wénkùnnɛ n yɛi.
5 M bɑntɛ́mu n cɑ̀ɑ̀rɛ̀mɛ̀,
n wúómmu n yɛi n sɑ̃́ɑ̃̀.
6 N yetɛ́nɛ̀ fɔ̃́ nwe ɑmɑ́ɑ̀,
kɛ dɔ̀ɔ̀ ɑ í dɔ́ dɛ̀,
dɛɛ̀ te kɑ̀ɑ yó nni nkpɑnnɛ̀ kɛ nɑɑti,
òmɔù bɑ́ɑ́ sɛi nhɑ beéntì.
7 N tú mɛyɛi nyiɛ̀ nwe nɛ̀ bɛ̀ m pɛinímɛ̀,
nɛ̀ mɛyɛi mmɛ n yɔ̃ m pùónnímmɛ̀.
8 A dɔ́ dɛ̀ onìtì yɛ̀mmɛ̀ miɛkɛ dɛɛ̀ tu:
Ò bo ntũmmɛ̀ timɔ́mmɔnti.
N duɔ́ mmɛciì n yɛ̀mmɛ̀ miɛkɛ.
9 N wénkùnnɛ nɛ̀ ìsɔ́pù kó tifɑ̃ɑ̃̀tì kɛ n wenkɛ pɑ́íí,
nh ɔ́útɛ́ kɛ n wenkɛ kɛ́nɑɑ́nnɛ̀ kupɑ̀ɑ̀kónkù.
10 Nɑ́ríkùnnɛ n yɛ̀mmɛ̀, n duɔ́ ndiwɛ̀ì,
kɛ̀ n yɛ̀mmɛ̀ɛ cɑ́tɛ́, mí nhɑ potɛ́ wè kɛ n nɑ̀ntoo.
11 Ũtɛ́ n yɛi mmɛmɔu,
bútínnɛ́ n cɑɑ̀rìmɛ̀.
12 Áú Kuyie! Nh ɑ̃nnɛ́ mɛyɛnwennimɛ,
tũntɛ n yɛ̀mmɛ̀ kɛ̀ mɛ̀ mbo ɑ bíɛ́kɛ̀.
13 Kuyie mbɑ́ m bɔntóo,
bɑ́ɑ́ dɛitɛ ɑ kó Muyɑɑ́nsɑ̀ɑ̀mù m miɛkɛ.
14 Wɛ̃tɛ kɛ́ n duɔ́ mmɛdɛɛtímɛ̀ kó diwɛ̀ì kɛ̀ nní ndɑ dɔ́,
n duɔ́ mmɛyɛ̀mmɛ̀ m bo nyíénnɛ̀mɛ̀ ɑ kpɛti.
15 N yóó bɛnkɛmu ɑ cɛ bɛ̀ɛ̀ yetɛ ɑ kpɛti,
kɛ̀ bɛyɛibɛɛ wɛ̃tɛní ɑ borɛ̀.
16 Áú Kuyie! Kuyie n dɛɛtíwè,
n nɔ̀ùtɛ̀ tɛɛ̀ yetɛ́.
N dɛɛtɛ́ kɛ̀ nní mpĩɛ̃kù ɑ n dɛɛtɛ́mɛ̀.
17 N Yiɛ̀ nKuyie nhɑɑ n nùù,
kɛ̀ n nɑ kɛ́ dɑ sɑ̃ntɛ.
18 A í dɔ́ iwũɔ̃ bɛ̀ dɑ feu ì,
ɑ í yíé mbɛ̀ dɑ feu ì kɛ tuɔ̀,
n nɑ nyì ndɑ fìému,
19 Kuyie nhɑ dɔ́ yɛ̀ɛ̀ pɑ̃rɛ̀ tu idebìi nyi,
onìtì wèè bɑntɛ́ o cɑɑ̀rìmɛ̀.
Áú Kuyie nhɑ í yetírí idebìi mɔ́mmɔnyi.
20 Bɛnkɛ ɑ sɑ̀mɛ̀ kɛ́dɔɔ̀ Siyɔ̃ɔ̃ mɛsɑ̀ɑ̀,
kɛ́wɛ̃tɛ kɛ́mɑɑ́ Sedisɑdɛmmu duotí.
21 Dɛ mɔ̀nnì ndi ɑ yóó dɔkɛmɛ̀ iwũɔ̃ ɑ yɛ̃ mbɛ̀ ndɑ feu ì
nɛ̀ bɛ̀ yó ndɑ tuɔ̀ nyì.
Dɛ mɔ̀nnì ndi ti yóó nɑmɛ̀ kɛ́fíé yɛnɑɑdɑkɛ̀ ɑ wũɔ̃tɔ̀nnì ĩ́nkɛ̀.