88
N duúnnɛ̀ mukṹṹ mmu
1 Bɛdèmbɛ̀ kóo kótì Kodee dentĩ̀nnì dìèmmɛ̀ Emɑnni Esidɑiti botí kou keutɛ́ fɛ̀ɛ̀ sɑ́útìyɛ̀nfɛ̀ kɛ eunɛ̀ fɛtɑ̃rifɛ.
2 N Yiɛ̀ nKuyie n dɛɛtíwè, nh ɔ̃ ntṹṹ nkɛ yu fɔ̃́ nwe,
kɛ̀ dɛ̀ bììtɛ nní ndɑ kuɔ̀nnɛ̀.
3 Keè m bɑ́ɑmmìi,
kéntɛ́ n dɑbònnì.
4 Dɛ̀ bi n wɛ̃nnì ndi,
n duúnnɛ̀ kudɔnkù nku.
5 Bɛ̀ n wèńtɛ́ ocíì nwe,
n wɛ̃rímú í kpɑɑ́.
6 Nɛ̀ bɛ̀ɛ̀ duɔ́ kudɔnkù tíì wɛ̃ ndidɔ́ù,
n sɑ̃̀ɑ̃́tɛ́nɛ̀ ocíì nwe wèè bo kudɔnkù,
ɑ yɛ̃̀ nwèè kpɛ́í,
ɑ nɔ̀ùtɛ̀ dɛ̀tɛ́nɛ̀ wè.
7 A n dootóo difɔ̃̀tìrì cũmpuri ndi,
dibiìnnì diɛrì miɛkɛ kudɔnkù.
8 A miɛkɛ kɛmɔu kɛɛ̀ do n yĩ́nkɛ̀ kɛ n yɔ̃̀ntɛ,
ɑ yɛ̃ĩti timɔu sɑ̃rì n yĩ́nkɛ̀ nkɛ.
9 Kɑ̀ɑ n dɛ́tinnɛ n kɔbɛ kɛ̀ n nɑɑ́ nyisíɛ́ bɛ kpɛ́í
n kpetímu, n yí mɔkɛ m bo yɛ̀ dɛ̀.
10 N tɑ mɛfɛ̃́ṹtímɛ̀ mmɛ kɛ kɔmmú kɛ̀ n nuɔ ntiikɛ.
N Yiɛ̀ nKuyie n kuɔ̀nnɛ̀ fɔ̃́ nwe yɛwe yɛmɔu,
n yuo n nɔu fɔ̃́ɔ̃̀ bíɛ́kɛ̀.
11 Bɛcíríbɛ̀ kpɛ́í nkɛ ɑ dɔɔrimɛ̀ tidiɛtɑ̀ɑ̀?
Bɛdɔmbìùbɛ̀ bo entɛ kɛ dɑ sɑ̃ntɑɑ̀?
12 Bɛ̀ɛ̀ bo difɔ̃̀tìrì miɛkɛ bɛ̀ nɑ̀ɑ́ nhɑ kó mɛsɑ̀ɑ̀ nkpɛ́ínɑ́ɑ̀?
Yɑ́ɑ̀ bɛ̀ɛ̀ duɔ́ kudɔnkù bɛ̀ bo nɑ́kɛ́ ɑ túmɛ̀ timɔ́mmɔnti yiɛ̀?
13 Bɛ̀ɛ̀ bo dibiìnnì miɛkɛ bɛ̀ bo bɑntɛ́ ɑ kó tidiɛtɑ̀ɑ̀?
Wèè tɑ kudɔmbìùkù ò bo nɑ kɛ́bɑntɛ́ ɑ wetímɑ̀ɑ̀?
14 N Yiɛ̀ nKuyie m búɔ́ fɔ̃́ nwe kɛ dɑ kuɔ̀nnɛ̀,
bɑ́ dìì kṹnweńnì kɛ̀ m bɑ́ɑmmu tùɔ̀kɛmu ɑ borɛ̀.
15 Dɛ̀ yĩ́mɛ n Yiɛ̀ nKuyie nkɑ̀ɑ n yetɛ,
bɑ nte kɑ̀ɑ í dɔ́ n dɑ yɑ̀.
16 N tú osénnìwè nwe nɛ̀ m bɛmmɛ̀,
n yí dɛ́tirìnɛ̀ mukṹṹ,
ɑ donnɛ́ n kɔ̃m̀bùɔ̀tì nti,
n tɛ̃́nkɛ í yɛ̃́ m bo tìì miɛkɛ.
17 A miɛkɛ kɛɛ̀ n cɔ̀útɛ́ kɛ n tùɔ,
ɑ yɛ̃ĩti tiì n sũ̀ṹ n kɛ̀ n yĩɛ̃kɛ tinɑ́ɑǹtì.
18 Yɛwe yɛmɔu ɑ yɛ̃ĩti tiì n fitɛ́ kɛ n dɑ̀tínnɛ́ mɛniɛ nkɔ̃mɛ,
kɛ n dɑ̀tínnɛ́ m mɔu dimɔ̀nnì dìmɑ́ɑ̀.
19 Kɑ̀ɑ n dɛ́tinnɛ n nɛ́pobɛ̀ nɛ̀ n nɛititɔbɛ̀,
kɛ̀ n kɔbɛ kó dimɑ̀ɑ̀ n dɛ́tɛ́nɛ̀.