23
Balaam menasana Israel apanawa osouwo saua kadiwa wapona, sa baiwa me Balak nata pulontona walamawa natadea. Tane me mai mo osouwo saua kadiwa waponaa rua, dia. Tane me God dewa eubu Israel apanawa mampo dewasapia umanawa wadie. God Israelwa umanau wana gagalowa Balaam wamona walamawa uduudu 4. Ita ema ipa me gagalowa natawa.
18 Ita Balaam gagalowa ema wane wanase:
“Balak, Sipo otopa,
Wine ne gagalona ema etaadewaitaa.
19 God ipa mai apanaida ruamba,
me mai laga wapi, dia.
Me mai insaisawa leusaipona,
no apanaida ruamba, dia.
Me dima wadia ruawaida dewasade.
Dima me sauawalene wadia ideita segaleide, mai dia.
20 Me ne dianena sau euda me apanawa osouwo itupa.
Me mo osouwo sau euda itun.
Sa baiwa ne saua sa mo osouwo ituna
mai wadapaaubepa rua, dia.
21 Iawe God ipa mo do,
mo nuaeu mampe mukantoie wadaposintoi
ipawa me ipa mo warereu.
Me ando mai poka saiwa daitada
Iakob nosinosiwa Israelwa osouwo itupi, dia.
22 God Israel apanawa Isibtiwa waimoio
banlamono nomoiena.
Me mukawa ipa debamaia,
kau dobinoa onawaa mukawa rua.
23 Mai mida da Israel apanawa osouwo
saua kadiwa wapia rua, dia.
Mai wene ba ginauri dewawa mampe
mo kadimopua rua, dia.
Tane mo Israel apanawa Iakob nosinosiwa
umanau wapue wapuase,
‘Ewane, God dewa pokawaa me apanawa baibu dewasan!’
24 Israel apanawa mukau ipa debamaia
pue onawaa laion rua;
me mai di wampia rua, dia, me ideita aleidie moiawa bomodie namode,
ita do osinapu remoleidio dialeide.
Ita edie aleidie bubualeidie ituleide.”