1 Kamar ma tapakur Yooba.

Kalŋanda isala mi tombo mboe pa ulaaŋa kiti mbolŋana raama menmeen ti.

Pa ni ta ipombolmbol ti mi imenderkalkaala iti.

2 Tamar kat ta kereene uunu mi lelende ambai pini.

Kalŋanda isala mi tombo mboe pakurŋana pini raama menmeen ti.✡ Ep 5:19

3 Pa Yooba, ni ta Anutu biibi ŋonoono, mi king biibi ŋonoono.

Ilip pa merere ta boozomen.✡ Mbo 47:2, 48:1

4 Ni imborro koroŋ ta boozomen ta irao toono ma ila.

Toono ta imbot meleeba kat ma ila isala abal ute ŋgutŋguutuŋan na, katuunu ta ni.

5 Tai mi toono na, koroŋ kini men tau. Pa ni itunu ta iur zin.

Mi itunu mburaana ta ikam ma toono raraazaŋana ipet.

6 Kamar tusuŋ mi tutuundu pa Yooba.

Telek kumbundu pini mi tapakuri.

Pa ni ta iur iti.✡ Pil 2:10

7 Ni Anutu kiti ta mataana piti mi imborro iti.

Mi iti na, sipsip kini tau.✡ Kam 23:21; Mbo 23:1

Koozi keleŋ kat Yooba kalŋaana. Iso ta kembei:

8 “Keleŋtut sua pepe. Kokena ŋgar tiom imbol mi kakam zooroŋana kembei ta muŋgu tumbuyom bizin tikam su lele bilimŋana ki Meriba mi Masa na.✡ Kam 17:7; Ibr 3:7+, 4:7

9 Indeeŋe tana, titoombo mburoŋ.

Pa nio aŋbelmbel uraata bibip pizin, mi zin tire kat mburoŋ pa matan.

Tamen tinoknok zooroŋana, mi tikam kinkiini be tire mini.✡ 1Kor 10:9

10 Tabe tikam ma leleŋ pizin risa som pa ndaama tomtooru.

Mi aŋso pizin ta kembei: ‘Wal tina, tiute zaala tio som,

mi gorgori lelen imbotmbot molo pio.’✡ Nam 14:34

11 Tana keteŋ malmal pizin, mi aŋbuk sua mbolŋana, mi aŋpombol ma imbol kat.

Sua ta kembei:

‘Ŋonoono kat. Toono ta aŋur pizin be tila ma keten su mi timbot ambai pa na, zin ko tirao be tilela na som. Som kat!’✡ Ibr 3:7-18