4
Tetã ojokopaa jave ikuai axya re ijayvuague
1 Mba'exa vy nda'u ouro oĩ va'ekue huũmba?
Mba'exa vy tu ouro ombovera pyre ndoveravei?
Ha'e rami ae avi oo iky'a e'ỹ va'e re ita ikuai va'ekue
omoaĩmbaa tape joaxa-axaa ha'e javi rupi!
2 Mba'eta Sião pygua yvatekueve ma
ouro oiky'a'o pyre rami ikuai va'ekue ri
aỹ ma ha'e kuery pe “Yapo guigua rive” 'ea,
nhae'ũ re omba'eapo va'e rembiapo ramigua!
3 Jagua-tuvy nhe'ẽ minha omokambu 'rã gua'y kue'iry.
Ha'e rã xeretarã kuery ma porayvu ve'ỹ ma ikuai
guyra-nhandu tekoa e'ỹa rupigua rami.* Guyra-nhandu ma ombo'a ma vy ngupi'a oeja rive 'rã (Jó 39.13-18).
4 Ha'e ramo kyrĩgue okambu va'e apekũ ipirupa ma,
ijy'uvei gui oja ijuru re.
Kyrĩgue mbojape re ojerurea rupi ikuai
teĩ avave rei nome'ẽai 'rã.
5 Tembi'u porã re okaru va'ekue ma
ho'apa 'rã okuapy tape rupi.
Onhemonde porãa rupi ikuai va'ekue ma
yty rupi rive ikuai.
6 Sodoma tetã minha xapy'a'i py omokanhymbaa raka'e
avave po py e'ỹ.
Ha'e rami teĩ Sodoma pygua kuery ojejavyague gui voi
xeretarã kuery ojejavyve va'e ikuai.
7 Mba'eta yvatekueve ma yro'y ha'e kamby gui xiĩve va'ekue,
ita coral va'e gui ipire pytãve va'ekue,
ha'e ita safira rami iporã va'ekue ri
8 aỹ ma hova tapyĩ gui ete huũve va'e.
Tape rupi ooa rupi avave rei ndoexa kuaavei.
Ipire ma ojapa ikãgue re,
yvyra rakã rami ipirupa va'e vy.
9 Mba'eta karuai gui omano va'e kuery gui
ovy'ave kyxe py ojukapy.
Mba'eta ndokarui va'e ma mbeguei'i opa oje'oivy.
Ho'u va'erã mba'ety rupi ndoikovei ramo omano tema 'rã oje'oivy.
10 Kunhague ymave rupi porayvu va'ekue ri
aỹ ma opo py ae omomimoĩ 'rã omemby kuery.
Ha'e kue'iry re ae 'rã okaru
xeretarã kuery omokanhymbaa ramo.
11 Senhor opoxya rupi oiko vy
ombou opoxya nhomoendyarã.
Sião re tata omonhemboja vy
ijyta peve oapypa.
12 Yvy regua ruvixa kuery ha'e yvy re ikuai va'e ha'e javi
ndogueroviai okuapy omombe'ua rã
Jerusalém rokẽ rupi hovaigua kuery oikepa maague.
13 Ha'e va'e oiko ha'e pygua profeta kuery ojejavyague re,
sacerdote kuery ojapo vaiague re guive,
mba'eta tetã mbyte rupi
omoẽ okuapy heko porã va'e ruguy.
14 Ha'e kuery ma ára revegua e'ỹ rami oguata rei tape rupi,
tuguy omoẽ va'ekue py iky'apa va'e ikuai,
ha'e ijao re ma voi avave rei ndovyxeai.
15 Ha'e kuery pe ojapukaia: “Ha'eve'ỹ va'e kuery, pejepe'a ke!
Pejepe'a ke, pexyry ke, pepoko eme orere!” 'ea.
Ha'e ramo ojava oje'oivy, ha'e ovaẽa py rei
ha'e kuery pe yvy regua kuery
“Apy ma nda'evei ae pendekuai aguã.”
16 Mba'eta Senhor ae omoaĩ imondovy opoxya rupi.
Ha'e rami vy nopenavei ma ha'e kuery re.
Hovaigua kuery katuve ma nomboetei 'rã sacerdote kuery,
ha'e nhomboaxya rupi e'ỹ 'rã oguereko nhomongeta va'ety kuery.
17 Ha'e gui ma ore kuery rexa ikangypa ma
orepytyvõarã ou va'erã re roma'ena vy teĩ.
Roikuaa potaaty py roarõ reve roma'ẽ tema
peteĩ regua orereraa jepe va'erã re teĩ ndoui ae.
18 Orerovaigua kuery ma orekuaia rupi oma'ẽ mbegue okuapy ramo
oreretã mbyte rupi orekuai aguã voi nda'evevei.
Ropa aguã ovaẽ rai'i ma,
ore'ára ojeupity ma,
aỹ ovaẽ ma ropa aguã ára.
19 Oremonhaa kuery ma
guyra yvate rupi oveve va'e gui inhakuãve va'e.
Yvyty ikuai va'e áry rupi ete oremonha,
tekoa e'ỹa rupi voi nhuã omoĩ okuapy orembo'a aguã.
20 Ha'e gui oreruvixave orerekombo'earã Senhor omoĩ va'ekue ae
ombo'a ma okuapy nhuã py.
Ixupe ma ore kuery “Nekuaray'ã py 'rã orekuai
yvy regua kuery mbyte rupi teĩ”, ro'e va'ekue ri.
21 Peẽ Edom pygua kuery Uz yvy re pendekuai va'e,
orejojai tema, pevy'a rei tema 'rã orere.
Ha'e rami avi pendea py voi 'rã omboaxaa kova'e karo.
Ha'e ramo peka'upa vy pendepire reipa 'rã peikovy.
22 Ha'e rã peẽ Sião pygua kuery, opa ma pendeko vaiague re penembopagaague.
Senhor napendereraa ukavei ma 'rã escravo-rã.
Ha'e rã peẽ Edom pygua kuery, araka'eve rã ojekuaapa 'rã
pendeko vaia ha'e pejejavyague.