98
1 Pemonhendu ke Senhor pe mboraei pyau,
mba'emo iporã ete va'e ha'e ojapo ramo.
Ojyva oiporu kuaa regua imbaraete ha'e iky'a e'ỹ va'e py ipo'aka.
2 Senhor oikuaa uka jogueraa jepeague.
Yvy regua kuery oexaa rupi oexa uka ha'evea rami joguerekoa.
3 Ndaexarai guive Israel kuery omboaxy rupi ojeroviapy oiko aguã re.
Ha'e ramo yvy jave re ha'e javi regua ikuai va'e oexa okuapy Nhanderuete nhandereraa jepeague.
4 Yvy jave re ha'e javi regua pendekuai va'e, peroporaei ke Senhor pevy'aa rupi!
Peporaei, pevy'a ha'e perovy'a mboraei py!
5 Mba'epu ixã reta va'e reve peroporaei Senhor,
ixã reta va'e pu rupi guive peporaei.
6 Pemonhe'ẽ mimby guaxu ha'e vaka rakuakue guigua.
Pevy'a Senhor renonde, huvixave oĩ ramo.
7 Tonhendu ye'ẽ ha'e hexe ikuai va'e ha'e javi,
yvy ha'e hexe ikuai va'e guive!
8 Yakã ha'e javi tojepo pete!
Yvyty ikuai va'e voi toporaei ovy'aa rupi
9 Senhor renonde,
mba'eta ou yvy re ikuai va'e re oikuaa pota aguã.
Teko porã rupi oikuaa pota 'rã yvy ha'e
yvy regua kuery re, peteĩ rami joguerekoa rupi.