2
1 Xee ma rosa poty Sarom rupigua rami,
ha'e yvoty yvyugua rupi ikuai va'e rami.
Ime ijayvuague
2 Yvoty juu mbyte oĩ va'e rami ae avi
kunhataĩgue mbyte xerembiayvu iporã.
Ta'yxy ijayvuague
3 Ha'e gui yvyra ikuai va'e mbyte maçã'y hi'aĩ va'e rami
kunumigue mbyte xerembiayvu iporã.
Ikuaray'ã py aguapyxe vai,
ha'e hi'a voi he'ẽ porã xevy.
4 Xereraa opy ja'o okaruaty py,
ha'e xe'áry rupi omopu'ã bandeira xerayvua kuaa ukaarã.
5 Anhemombaraete 'rã uva pirekue py,
anhenhandu porã 'rã maçã ha'u vy.
Mba'eta ayvu vaipa vy naxepytuẽ kuaavei.
6 Ijaxua regua toĩ xeakã guýry,
ha'e rã oiporu kuaa regua ma taxekuavã.
7 Jerusalém memby kuery, pendevy pe ajerure
guaxu ha'e guaxu kunha ka'aguy rupi ikuai va'e rupi:
Pemomyĩ eme rojoayvua, tove toke ranhe,
ha'e ae ovyxe e'ỹa ja.
8 Aendu xerembiayvu ijayvu rã.
Ma'ẽ, ha'e ou pojava yvyty áry rupi,
yvy'ã ikuai va'e rupi opo-opo ouvy.
9 Xerembiayvu ma guaxu e'ỹ vy guaxu ra'y'i rami inhakuã va'e.
Ne'exa, orero mbotya kupe py hi'aĩ,
janela rupi oma'ẽ ho'amy,
oexa pota ho'amy janela jokoa pa'ũ gui.
10 Ha'e gui xerembiayvu ijayvu vy aipoe'i xevy:
Ime ijayvuague
Xerembiayvu, epu'ã ke.
Xemba'e porã, eju.
11 Mba'eta yro'y oaxa ma,
oky voi oaxapa ma.
12 Yvoty henhoĩmba ma yvy re,
ovaẽ ma guyra kuery onhe'ẽ aguã ára.
Pyku'i voi onhe'ẽ nhendu ma nhandeyvy rupi.
13 Figo'y voi ijypy ma hi'a aguã,
uva poty reakuã voi nhaetũ ma.
Epu'ã na xerembiayvu.
Xemba'e porã, eju ke.
14 Xerymba apykaxu,
ita pa'ũ ha'e itaova yvateve renhemia rupi reiko va'e,
exa uka na nderova,
ha'e taendu ndeayvu.
Mba'eta ndeayvua he'ẽ,
ha'e nderova ma aexaxe vai va'e.
Ta'yxy ijayvuague
15 Pejopy na mbyku ha'e mbyku'i uvaty ombovaipa va'e,
mba'eta oremba'e uvaty rupi ipotypa ma.
16 Xerembiayvu ma xemba'e, ha'e xee ma imba'e aiko.
Ha'e ma omongaru 'rã guymba kuery yvoty ikuaia rupi.
17 Xerembiayvu, ára yro'y rei'i ha'e pytũ e'ỹ teria ja ejevy ju.
Enha ejuvy guaxu e'ỹ vy guaxu ra'y'i rami, yvyty itatya rupi.