12
Iobu na e haere
1 Bena Iobu na e haere, eto:
2 Momokani, umui na herea;
ba mase negana ai aonega baine ore.
3 A lau danu mai aonegagu, umui heḡereḡeremui,
umui ese asio hereagumu.
Ini ḡau daika asi dibana?
4 Turagu ese e kirikirilaigumu;
lau, Dirava na boi henia bena e haere henigu tauna,
lau, kara maoromaoro bona asi egu kerere tauna,
e kirikirilaigumu.
5 E noho ḡoeva-daemu tauna lalona ese
e hekwakwanaimu tauna na e dadaraiamu;
to hekwakwanai vada e heḡaeḡaemu,
aedia e dedimu taudia ediai.
6 Dadidadi taudia edia kalaga na mai mainodia,
bona Dirava e habaduamu taudia na e noho namonamomu;
e tomu edia dirava na imadia ai.
7 A uda boromadia ba nanadaidia, bena bae hadibamu;
atai manudia danu, bena bae hamaoromu;
8 eiava tanobada avadia, bena bae hadibamu;
bona davara gwarumedia, bena bae herevalai henimu.
9 Idia iboudiai bogaragidiai daika asi dibana
Iehova imana ese ina kara vada e karaia?
10 Mauri ḡaudia iboudiai edia mauri na ia imana ai,
bona taunimanima iboudiai laḡadia danu.
11 Taia ese hereva e mamidia tohomu,
udu ese aniani e mamidia tohomu na heto, ani?
12 Aonega na taunimanima burukadia ediai,
bona dina momo ese lalo-parara e havaraiamu.
13 Aonega bona siahu na Dirava enai;
hahealo bona lalo-parara danu ia enai.
14 Bema ia ese ruma baine ḡiḡia dobi,
ta ese basine haginia lou diba;
bema ia ese tau ta baine koua ahu,
ta ese basine kehoa diba.
15 Bema ia ese sinavai lanudia baine laodia ahu, vada bae kororo;
a bema ha-arudia lao, bena tanobada bae habubunidia.
16 Goada bona aonega na ienai;
koikoi tauna bona ia e koia tauna na iena.
17 Hahealo taudia na ia ese ḡaḡaedia mo e hakaudia ohomu;
hahemaoro taudia na ia ese e hakavakavadiamu.
18 Hanua pavapavadia na e ruhadia negemu,
bona riorio dabuadia e hariolaidiamu.
19 Hahelaḡa taudia na ia ese ḡaḡaedia mo e hakaudia ohomu;
bona siahu taudia na e hamorudiamu.
20 Taunimanima ese e abidadama henidiamu taudia ududia na ia ese e hakapudiamu;
bona tau-badadia edia lalo-parara na ia ese e abia ohomu.
21 Lohia taudia na ia ese e ḡonaḡonalaidiamu;
bona goada taudia na edia gaba gavadia e ruhadiamu.
22 Dobu gabudia na dibura lalona amo e kehodiamu,
bona dibura masemase gabudia na e hadiaridiamu.
23 Tanobada besedia na e habadadiamu, bona e habuadia tarimu;
e hahutumadiamu, bona e hakaudia ohomu.
24 Tanobada besedia lohiadia edia amo lalo-parara e abia ohomu;
e siaidia laomu, tano gagaena ai bae loa kava loa kava.
25 Dibura ai e hedarahumu, asi edia diari;
ia ese e hararagadiamu, kekero tauna na heto.