6
Runae thung hoi yuemkamcu ratoumnae
Kathutkung: Devit
1 Oe BAWIPA, lungkhuek laihoi na yue hanh,
na lungphuen laihoi na yue hanh.
2 Oe BAWIPA, na pahren haw. Ka tha a youn.
Oe BAWIPA, na dam sak haw.
Ka hrunaw teh runae a kâhmo toe.
3 Ka hringnae hai a ru toe.
Oe BAWIPA, nâsittouh maw na ro han.
4 Oe BAWIPA, bout ban nateh, na rungngang haw.
Oe na lungmanae hoi na rungngang haw.
5 Bangkongtetpawiteh, duenae koehoi nang pouknae awmhoeh,
apinimouh phuen koehoi lunghawinae lawk a dei han.
6 Ka cingounae koe ka tâwn.
Kho pei ka dai lah ka ikhun dawk ka ka teh,
ka mitphi ni lahoung koung a duk sak.
7 Lungmathoenae kecu dawk ka mit koung a ro teh,
ka tarannaw kecu dawk a mawm toe.
8 Payonnae kasaknaw pueng,
na cettakhai awh leih.
Bangkongtetpawiteh, BAWIPA ni ka kanae lawk hai a thai.
9 BAWIPA ni ka kâheinae hah a thai toe.
BAWIPA ni ka ratoumnae hah a dâw han.
10 Ka taran pueng kaya laihoi ru awh naseh.
Ban awh naseh, vaitalahoi kayak awh naseh.