1 Nder wuro Baytaniya no woodi gorko bi'eteeɗo Laajaru, Laajaru oo yemaaki. Omo woodi sakiraaɓe makko rewɓe ɗiɗo gom, Marta e Mariyaama. 2 Mariyaama woni debbo bujunooɗo nebbam uurɗam dow koyɗe Iisa, moytiri ɗe gaasa mum.* 11.2 Daaru dewtere ndee 12.1-8. Too, Mariyaama oo banndum gorko woni Laajaru oo.

3 Sakiraaɓe Laajaru rewɓe ɗiɗo ɓee lili goɗɗo wi'a Iisa :

—Moodibbo, war ! Giɗo maaɗa yamɗaa.

4 Nde Iisa nanunoo ɗum, sey wi'i :

—Nyaw nguu hanaa nyaw mbaroowu. Amma ngu wari ngam wannginde teddungal Alla, heɓa *Ɓii-Alla oon duu teddinee.

5 Iisa no hiɗi Marta, Mariyaama e sakiike maɓɓe gorko Laajaru. 6 Baa nii ko Iisa nanii Laajaru yamɗaa, ɗum haɗaay mo jooɗaade to o wonnoo toon balɗe ɗiɗi. 7 Gaɗa ɗum o wi'i *aahiiɓe makko :

—En coƴƴoo leydi Yahudiya !

8 *Aahiiɓe ɓeen mbi'i mo :

—Moodibbo, ɓooyaay ko *Yahudankooɓe tefi faɗɗude ma kaaƴe nder leydi ndiin. Toon ngiɗaa soƴƴaade kaden naa ?

9 Iisa jaabii ɓe wi'i :

—Hanaa jamɗe sappo e ɗiɗi ngoni nder nyalooma gooto naa ? Dilloowo nyalooma fuu fergataako ngam no hi'a jeyngol duuniyaaru. 10 Amma dilloowo jemma fergoto ngam jeyngol walaa he makko.

11 Gaɗa o haalii haalaaji ɗii, o wi'i ɓe :

—Higii'en Laajaru ɗaanake, mi yahan, mi findinowa mo.

12 Nden ɓe mbi'i mo :

—Moodibbo, se tawaama o ɗaaniiɗo, ndenne o daɗan.

13 Maayde Laajaru o haalani ɓe. Amma kamɓe kay, ɓe miilataana ko filla ɗoyngol allawol ngool nii o wondi. 14 Nden Iisa laaɓinani ɓe, wi'i :

—Laajaru laatake ! 15 Mi nani belɗum ngam mooɗon ko mi tawaaka toon. Ɗum laatanto on sabaabu goonɗinol. Amma en njaha to makko.

16 Nden Tomas bi'eteeɗo Funeejo wi'i *aahiiɓe ɓeeto :

—Accee, njehen enen duu baa nde en maaydan he makko non.

17 Wakkati Iisa yottii, tawi Laajaru waɗi balɗe nay he mooɓeede. 18 Hakkune Baytaniya e *Ursaliima ɓuraa kilooji tati. 19 *Yahudankooɓe ɗuɓɓe ngari kinniri Mariyaama e Marta maayde Laajaru.

20 Wakkati Marta nanunoo Iisa no wara, o acci Mariyaama no jooɗii nder suudu, o yehi o jaɓɓitowii mo. 21 Marta wi'i Iisa :

—Joomam, se nii aɗa wonnoo ɗo, banndam gorko maayataano. 22 Amma miɗo anndi baa joonin, ko ƴamɗaa Alla fuu, o waɗante ɗum.

23 Nden Iisa wi'i mo :

—Bannda gorko no ummitoto.

24 Marta wi'i :

—Miɗo anndi ko o ummitittoo nyannde darŋal.

25 Iisa wi'i mo :

—Miin woni ummitaaki maayɓe, miin woni mbuurnam duu. Neɗɗo fuu goonɗinɗo kam, baa se maayi, no wuuran. 26 Buurɗo goonɗinɗo kam fuu, maayataa abada. A goonɗini ɗum naa ?

27 Marta wi'i mo :

—Ayyo, Joomam ! Mi goonɗini aan woni *Almasiihu, *Ɓii-Alla, bannganɗo duuniyaaru nduu.

28 Gaɗa ko o haali ɗum, o yehi o noddowi sakiike makko, Mariyaama. O nyo'ani mo, o wi'i :

—Moodibbo oon warii, omo nodde.

29 Illa ko Mariyaama nanunoo ɗum, o yaawɗi o yehi to Iisa.

30 Wakkati mum fuu Iisa naataay wuro ngoon ginan. Omo wonnoo to Marta fottunoo he makko. 31 *Yahudankooɓe wondunooɓe he Mariyaama nder suudu no cawrina mo, wakkati ɓe ngi'unoo o yaawɗi o wurtii, sey ɓe tokki mo, ngam ɓe miilii to annyeere ndeen o fa'i faa o woyowa.

32 Nde Mariyaama yottii to Iisa woni, illa o hi'i mo, o hofi yeeso makko, o wi'i :

—Joomam, se nii aɗa wonnoo ɗo, banndam gorko maayataano.

33 Wakkati Iisa hi'unoo Mariyaama e *Yahudankooɓe wondunooɓe he mum ɓeen no mboya, ɓerne makko metti sanne.

34 O wi'i :

—Toy mooɓuɗon mo ?

Ɓe mbi'i mo :

—Moodibbo, war, ƴeewu !

35 Sey Iisa fusi gonɗi. 36 Nden *Yahudankooɓe gom mbi'i :

—Ƴeewee no o hiɗiri mo.

37 Amma woɓɓe maɓɓe duu mbi'odiri :

—Bumtinɗo bumɗo no waawaa haɗude gorko oo maayde naa ?

38 Ɓerne Iisa metti kaden, nden o yehi tiimoyde annyeere ndeen. Annyeere ndeen, lowol maɓɓiraangol hayre non. 39 Nden Iisa wi'i :

Ittee hayre ndee !

Marta sakiike maayɗo oon wi'i mo :

—Joomam, hannden tawan henndu makko waylake, sabu hannden woni balɗe makko nay he maayde.

40 Iisa jaabii mo, wi'i :

—Hanaa mi wi'i ma, se a goonɗini, a hi'an baawɗe Alla naa ?

41 Ɓe itti hayre ndeen. Iisa tiggitii, wi'i :

—*Baabiraawo, mi yettii ma ngam a hettinake kam. 42 Miin kay, miɗo anndi nyannde fuu aɗa hettinanii kam. Amma mi haaliri nii sabu himɓe dariiɓe ɓee, ngam ɓe ngoonɗina aan lili kam.

43 Gaɗa haalaaji ɗii, o ɓanti daane makko, o huuɓi sanne, o wi'i :

—Laajaru, wurta !

44 Sey maaynooɗo oon wurtii. Juuɗe mum e koyɗe mum no kaɓɓaa leppi, yeeso mum no suddii. Nden Iisa wi'i ɓe :

—Piirtee mo o yaha !

45 Ɗuɓɓe nder *Yahudankooɓe warnooɓe to Mariyaama, hi'uɓe ko waɗi, ngoonɗini Iisa. 46 Amma gere maɓɓe njehi to *Fariisa'en, kaalani ɓe ko Iisa waɗi. 47 Nden *Fariisa'en e hooreeɓe *cakkanooɓe Alla ngaɗi hawriine mawne, ɓe mbi'i :

—Noy ngatten ? Ngam gorko oo no waɗa kaayɗe ɗuɗɗe. 48 Se en accirii mo nii, ɓe fuu, ɓe ngoonɗinan mo. Nden himɓe *Rooma ngara, nannga *Juulirde meeɗen mawne e lenyol meeɗen.

49 Gooto maɓɓe bi'eteeɗo Kayafas laatiiɗo mawɗo *cakkanooɓe Alla nder hitaane ndeen, wi'i ɓe :

—Onon, on anndaa baafuy. 50 On anndaa ko neɗɗo gooto maayana himɓe fuu no ɓuri wooɗande en dina lenyol ngool fuu halka.

51 Hanaa muuyo makko o haaliri haala kaa, amma annabaaku o waɗi ɗoon. Hitaane ndeen kanko woni mawɗo *cakkanooɓe Alla, nder annabaaku nguu o wi'i ko Iisa no maayanan lenyol ngool. 52 Hanaa lenyol ngool tan o maayanta, amma ngam o hawra ɓiɓɓe Alla sankitiiɓe ɓeen fuu laatoo gootum.

53 Illa nyannde mum, hooreeɓe *Yahudankooɓe caawodiri dow no ɓe mbardata mo. 54 Ɗum duu waɗi Iisa acci fiilaade hakkune *Yahudankooɓe. Nden o yehi Efrayim, wuro wonngo har ladde yeeruure. O jooddii he *aahiiɓe makko.

55 Juulɗe *Yahudankooɓe gom bi'eteeɗe *Juulɗe dimɗinol Isra'ilankooɓe ɓadake. Sey himɓe ɗuɓɓe nder leydi ndiin njehi *Ursaliima faa laaɓina ko'e mum fadde juulɗe ɗee fuɗɗude. 56 Ɓe ndarii nder *Juulirde mawne ndeen, iɓe tefa Iisa, ɓe mbi'odiri :

—Ɗume miiloton ? O waran to juulɗe ɗee naa noy ?

57 Tawi mawɓe *cakkanooɓe Alla e *Fariisa'en kokki tilsinoore wi'ude annduɗo to o woni fuu, haala faa o nanngee.