2
A niaring na pite varpa kai Iona
1 Ma Iona i ga araring ta ra bala i ra en tadav ra Luluai kana God. 2 ma i ga biti:
Iau ga tangi tadav ra Luluai, tago i ga tup iau ra kinadik,
Ma i ga torom tagu.
Iau ga tangi ta ra bala na ruarua na tulungen,
Ma u ga valongore ra nilaigu.
3 Tago u ga vue vaba iau ta ra lulur na ta, ta bala na ta iat;
Ma ra lubu na ta i ga tur kikil iau;
Ma kaum lavur bobol ma kaum lavur top dia ga vana taun iau.
4 Ma iau ga biti dari: Di tar vue iau kan ra matam;
Ma a dovotina ina lingan mulai upi kaum pal i gomgom.
5 A ta i ga alir kikil iau, ma iau ga to na virua;
Iau ga ki ta ra lamanana;
A liaur i ga vivi ra ulugu.
6 Iau ga kuba ta ra bit a lualuana;
Di ga banu bat vatikene ra gunan namur tagu;
Ma ga u Luluai, kaugu God, u ga vairop vatutua kaugu nilaun kan ra tung.
7 Ba ra tulungeagu i ga matmat tagu, iau ga nuk pa ra Luluai,
Ma kaugu niaring i ga ruk piram ta kaum pal i gomgom.
8 Diat dia torom ta ra magit vakuku, nina i vavaongo,
Dia vana kan kadia varmari iat.
9 Ma ina pait kaugu tinabar piram ma ra nilai ra pite varpa;
Ina pait nam ra magit ba iau ga vavalima tana.
A varvalaun kai ra Luluai kaka.
10 Ma ra Luluai i ga tata tadav ra en, ma i ga marue vue Iona tar ta ra valian.