1 Ona da ki na varmaram ma da en ra ngungu magit ba pa ta nangnang tana,

I boina ta dir ma ra pal ba i tup ia ra lukara tana ma ra varngangar bula.

2 A tultul ba na mal kana papalum na vatur vake ra varkurai ure natu i ra luluai ba i bilak kana mangamangana,

Ma na vatur vake ra tiniba na tabarikik varurung ma nam ra barturana.

3 Di tun vagomgom ra silva ta ra kabala, ma ra goled ta ra ubu,

Ma ga ra Luluai i valar ra bala i ra tarai.

4 A tena pait ra kaina i kapupi ra bilak na tinata,

Ma ra tena vartuam i nuk pa ra pirpir maul.

5 Nina i kulume ra tolong i vul nina i ga vaki ia,

Ma nina i gugu ta ra magit na varmonong pa na pila ta ra varkurai.

6 A umana bul mur dia da ra kere pire ra umana patuana,

Ma ra umana bul dia langlang ta ra umana tama i diat.

7 A bo na tinata pa i topa ra lunga;

Ma damana ra vaongo pa i topa tuna ra luluai.

8 A vartabar i da ra ngatngat na vat pire nina i tul tar ia;

A lavur gunan ba i vana tana i tavua.

9 Nina i tuba ra kaina mangamangana i tikan upi ra varmari,

Ma ga nina i vaarike milat pa ra magit i varbaiane diat dia ki na bartalaina.

10 A varpit i ki muka ta ra uru i ra tutana ba i matoto,

Ma ra lunga pa i boina ta ra mar na mememene.

11 A tena varongongoi i mainge ke ra vinarubu na varpiam,

Ma da tulue ra dekdek na tultul pirana.

12 I boina a ik ba tika na tutana dir a varkuvo ma tika na bear* A bear, tika na mangana leing, a tena varkarat ma i ngala ra dekdekina. ba di ga long ra umana natuna kan ia,

Ma pa i boina ba na barat ra lunga.

13 Nina i bali ra boina ma ra kaina,

Ra kaina pa na vana kan ra kubana.

14 A vunapai ra varngangar i da ra tua na tava ka,

Kari una nur vue ra ik. a vartoto ba pa ta varngangar boko.

15 Nina i kure valangalanga ra tena varpiam, ma nina i kure vakaina ra tena takodo,

Dir par ra Luluai i milikuane dir.

16 Ta ra ava ra lunga i vatur vake ra mani upi na kul ra kabinana me,

Ma ra nuknukina pa i tale?

17 A talai dat tuna i varmari vatikai,

Ma di kava tura i dat ure ra bung ba na tup dat.

18 A tutana ba pa i kabinana i vavalima,

Ma i tur kia ure ta tikai ta ra luaina mata i talaina.

19 Nina i mainge ra varpiam i mainge ra varngangar;

Ma nina i pait vangala ra matakilalat ta ra kubana urama i tikatikan upi ra vinirua.

20 Nina i gegagege ra nuknukina pa na gire tadav ra bo na magit,

Ma nina ba i rara ra karameana na bura ta ra magit na varmonong.

21 Nina i vangala ra lunga na lingligur tana,

Ma nina dir tamana ma ra lunga pa na gugu.

22 A gugu ta ra nuknuk i dat i valagar dat,

Ma ra tinabun ta ra bala i dat i vapalaur dat.

23 A kaina tutana i alube pa ra kul varbat ta tikai i ga ive ta ra bongobongono,

Upi na pukue varara ra nga na varkurai.

24 A kabinana i ki ta ra luaina mata i nina i kapa ra nuknukina,

Ma ga ra mata i ra lunga i tikatikan ta ra langlangun na rakarakan a gunagunan.

25 Ona tika na bul i papaua tamana i tabun ure,

Ma i da ra magit i mapak pire nina ba i ga kava vaarike.

26 Pa i boina ba da vanganga ra tena takodo,

Ma pa i boina bula ba da luba ra umana ngalangala ure ra dovot na mangamangana.

27 Nina i tatike ra paupau tinata ka i kabinana,

Ma nina ba pa i ngangar ra nuknukina a matotono nam.

28 Damana bula ra lunga, ba i ki mut di biti ba i kabinana;

Ba i paum bat ra ngiene di biti ba i matoto.