1 A umana tinata kai Agur natu i Iake; a mamat na tinata.

Ra tutana i biti tai Itiel, tai Itiel ma Ukal, dari:

2 A dovotina iau ra ngala na koloata ta ra tarai par,

Ma pa iau minana da ra tarai.

3 Ma pa iau ga vartovo ta ra kabinana,

Ma pa iau matoto ta ra Lia Kakit.

4 To ia i ga tutua urama ra bala na bakut ma i ga kuba mulai?

To ia i ga vatur vake ra vuvu ma ra limana?

To ia i ga pulu ra lavur polo ma kana mal?

To ia i ga vung vapadikat ra umana ngu na rakarakan a gunagunan?

To ia ra iangina, ma to ia ra iang i natuna, a tutana?

Kan u nunure?

5 A tinata par kai God i gomgom;

I da ra bakbakit pire diat dia nurnur tana.

6 Koko una vot kana tinata,

Kan na pit u, ma na tapala ba u a tena vaongo.

7 A ura magit iau tar lul ia piram;

Koko una muie dir tagu ba iau laun boko:

8 Una tak vue ra mangamangana vakuku kan iau ma ra lavur vaongo;

Koko una tul tar ra kini na luveana tagu ba ra kini na uviana;

Una tabar iau ma ra magit na nian ba i topa iau,

9 Kan ina ga maur tuna, ma ina pue vue u, ma ina ga biti: To ia ra Luluai?

Ba kan ina iba, ma ina loalong, ma ina kaba ra iang i kaugu God.

10 Koko una takun vavaongo ra tultul pire kana luluai,

Kan na bor vakaina u, ma da takun u.

11 Tika na taun tarai dia tata vabilak tama i diat, ma ra tutana,

Ma pa dia tata vadoane na i diat.

12 Tika na taun tarai dia malamala tena gomgom,

Ma a dovotina, pa di ga dalu vue kadia dur.

13 Tika na taun tarai, ea, dia matana luluai!

Ma ra pilpil na mata i diat i tur arama iat.

14 Tika na taun tarai a umana pal a ngie i diat dia da ra umana pakat na vinarubu, ma kadia umana gabar dia da ra umana banam,

Upi diat a konom vue ra umana luveana kan ra rakarakan a gunagunan, ma diat dia ki na niiba kan ra tarai.

15 Ra domol a ura natuna; dir vala biti, Una vartabar, una vartabar.

A utul a magit nina pa dital maur tika na bung,

A ivat ba pa dia biti, I tar topa ia:

16 A ruarua na tulungen, a vavina i biu,

A pia ba pa i bilim ma ra tava,

Ma ra iap ba pa i biti, I tar topa ia.

17 A mata i nina ba i vul tamana ma i pidimuane ra tinorom tadav nana,

A umana kotkot ta ra male diat a tolok vue,

Ma ra umana nat na luar diat a en ia.

18 A utul a magit dital pidik piragu,

A ivat pa iau nunure diat:

19 Ra nga kai ra taragau ta ra maup,

Ra nga kai ra vui ta ra ul a vat ki,

Ra nga kai ra parau ta ra ul a ta,

Ma ra nga kai ra tutana tadav ra inip na vavina.

20 Ra mangamangana kai ra vavina, a tena nipo, i dari:

I ian, ma i u ra ngiene,

Ma i biti, Pa iau ga pait ta kaina magit.

21 Ure a utul a magit a gunan i guria,

A ivat pa i ki vamadudur vue diat:

22 A tultul ba i ki na king,

A lunga ba i maur ma ra magit,

23 A milmilikuan na vavina ba dir taulai ma ra tutana,

Ma ra tultul na vavina ba i kia vue kana tadar vavina.

24 A ivat na magit dia ikilik ta ra rakarakan a gunagunan,

Ma dia kabinana tuna:

25 A umana rumi vakir dia dekdek,

Ma ga dia varurue ra adia magit ta ra kilala na keake;

26 A umana mang dia bilua ka,

Ma ga dia pait ra kubakuba i diat ta ra lavur vat;

27 A umana kubau pa kadia ta king,

Ma ga dia vana rikai da ra umana loko na tarai na vinarubu;

28 Ra kupkup pa i dekdek upi una vatur vake,

Ma ga i kiki ta ra kuba i ra umana king.

29 A utul a magit dital vanavana da ra luluai,

A ivat dia pa na luluai:

30 A leon i lia kakit ta ra lavur leing,

Ma pa i tur are ta ra na;

31 Ra loko na kakaruk; ra me, a tomotoina; ma ra king ba i lue ra tarai na vinarubu.

32 Ona u ga lunga ma ra malamala luluai,

Ba ona u ga nuk pa ra kaina magit,

Una paum bat ra ngiem.

33 Tago ba di guaguan ra polo na u, na bira;

Ma ba di bing ra bibilau, i gap;

Damana ba di guaguar ra kankan, a varngangar i arikai.