31
1 Lemuele, Masa pavapavana, ena hereva bini, sinana ese e hadibalaia herevadia.
2 Natugu e, bogagu amo o vara merona,
natugu e, egu gwauhamata amo o vara merona,
ede baina hereva henimu toma?
3 Emu goada na hahine basio henidia;
emu dala na pavapava iala-masedia taudia basio henidia.
4 Dia namo, Lemuele e,
dia namo pavapava ese vine ranuna bae inua;
dia namo hanua lohiadia ese kekero muramurana bae ura henia;
5 bae inu bena taravatu bae readia,
bona hisi e animu taudia iboudiai ahudia korikori bae ha-idau na garina.
6 Kekero muramurana na mokona e masemu tauna ba henia,
bona vine ranuna na lalodia e hisihisi hereamu taudia ba henidia;
7 do bae inu, bena edia ogoḡami bae laloa boio,
bona edia hisihisi basie laloa une.
8 Udumu ba hapapaia, mu taudia daidiai,
bona ihareha iboudiai ahudia korikori daidiai.
9 Udumu ba hapapaia, ba hahemaoro mai maoromaoromu ida,
ogogami taudia bona e dabumu taudia ahudia korikori inanatalaidia.
10 Hahine namona na daika ese baine davaria?
Ia ese herahera nadinadidia namo-heredia e hereadiamu.
11 Adavana lalona ese ia e abidadama heniamu,
bona ḡau namodia ai basine dabu.
12 Hahine unuhetomana ese adavana e hanamoamu, se hadikaiamu,
ena mauri dinadia iboudiai lalodiai.
13 Mamoe huina bona lagwa varona e tahudiamu;
ia imana na gaukara e uramu.
14 Ia na hoihoi taudia edia lagatoi na heheto,
ana aniani na dauha amo e mailaimu.
15 Daba vaburana ai e tore isimu,
ena ruma taudia adia e nadu hatamu,
bona ena hesiai kekenidia edia ḡaukara e henidiamu.
16 Tano ta ihoina e lalo-hadailaiamu, bena e hoiamu;
ena ḡaukara anina amo vine imeana e hadoamu.
17 Goada e rioamu,
bona imana e ha-aukadiamu.
18 Ena hoihoi anidia namodia e itamu;
hanuaboi ai ena lamepa na se bodomu.
19 Dabua ihatuna auna na imana ai e abiamu,
bona igirolaina gau na imana amo e dogoa taomu.
20 Ia ese imana e kehoamu ogogami taudia ediai;
bona imana ruaosi e toi roromu, e dabumu taudia ediai.
21 Keru negana ai ena ruma taudia se kudou hetahalaidiamu,
badina be iboudiai na mai edia dabua kakakakadia.
22 Ia ese hetaru e karamu;
ena dabua na linen namo-hereana bona dabua kakakaka miakoremana.
23 Hanua ikoukoudia lalodiai taunimanima ese ia adavana e dibaiamu;
ia na hanua tau-badadia bogaragidiai e helaimu.
24 Ia ese linen dabuadia e karadiamu, bena e hoidiamu;
gaba ḡaudia danu hoihoi taudia dekedia e siaidia laomu.
25 Goada bona ninina-namo e hahedokilaidiamu;
nega vaira dinadia ia ese e kiri henidiamu.
26 Uduna e hapapaiamu mai aonegana ida,
bona hebogahisi ihahedibalaina na matana ai.
27 Ena ruma taudia edia kara e ita taomu;
bona aniani inonogadia se animu.
28 Natuna e tore isimu, namona e gwauraiamu;
adavana ese e imodaiamu danu, e tomu:
29 Hahine hutuma vada e kara namo herea,
to oi ese iboudiai o hereadiamu.
30 Kara laloa-laloa na koikoi, bona hairai na asi anina;
a Iehova garina e garimu hahinena na bae imodaia.
31 Ena gaukara anina ba henia,
bona ena kara na hanua ikoukouna ai do bae imodaia.