28
Vinaravara Tinepa Tinokae te Devita
1 Kei Zihova, qua patu aqorae na qua lave,
koa Goi mo si varavara atu rau.
Mu avoso mae au;
be lopu va tabe mae au Goi,
si kote somana gore la si rau pa vasina tadi na tie matedi.
2 Mu avoso mae au pana tepa atu tinokae si rau,
totoso va sagei rau sari na limaqu koasa Mua Zelepade hope pa korapa vinaravara.
3 Mu lopu va kilasa turaṉae nau koari na tie kaleadi, na tie sekesekeidi.
Arini pu baere pa berudi mo ba bulodi si ta siṉie na kinukiti.
4 Va kilasi koari na tinavete pu taveti rini,
koari na dia tinavete kaleadi;
Mu tabara ni koari na tinavete pu evaṉa ni rini pa limadia,
poni pule lani gua sapu garodi.
5 Lopu hite doṉo la ia rini gua sapu evaṉia e Zihova,
babe gua saripu ele va podaki Sa;
ke kaqu va kilasi Sa si arini,
meke va eoṉo hokari Sa.
6 Vahesia se Zihova,
ura ele avosia Sa sa qua tinepatepa tinokae.
7 E Zihova si na qua ṉiniraṉira,
lavelave hukata nau na harupau Sa,
Kalavarae koa Sa sa buloqu,
toka nau Sa, ke qetu nia rau.
Ke vahesia rau si Asa pa kinera.
8 E Zihova si na ṉiniraṉira tadi na tinoni Tanisa,
meke lavelave hukata nia sa sa baṉara sapu vizatia Sa.
9 Zihova, Mu harupi sari na Mua tie,
Mu mana ni sari na Mua butubutu.
Mamu koa na dia Sepati si Agoi,
Mamu kopu ni si arini ninae rane ka rane.