7
Bab-dummadyob-ibmar-imaklegedgi sunmaklenaid
(Éxodo 34:10-17)
1 Moisés Israel-dulemarga sogdebalid: “Be-Bab-Dummad-Jehová be-yar-susokarmaladgi bemargadga-guega bemar-odogoed. Bab-Jehová, bemar-idu dule-bukidar-bukwamalad onogoed:
Het-dulemar, Gergeseo-dulemar, Amorreo-dulemar,
Canaán-dulemar, Ferezeo-dulemar, Heveo-dulemar,
degi, Jebuseo-dulemar-bukwad, onogoed.
”We-dulemar-sogagugle-gumaladi (7), bemarba bur-melu sordamar nikamalad. Degine, bemarba bur dutusurmarbalid. 2 Degi-inigwele, be-Bab-Dummad-Jehová, bega we-dulemar-urmaksale, bemar egi nakwisale, be bela we-dulemar-ogilomaloed.
Melle be we-dulemarbo igar-mesdii nanamalo.
Melle be wiledakdii nanamarbalo.
3 Melle be we-dulemarbo nikumalo.
Melle be be-sisgan a-dule-masmala-nikuega imako.
Melle be e-sisgan be-masmala-nikuega be imakbalo.
4 ”Ar we-omegana, be-masmala-angi-banguega imakmaloed, bab-dummad-baiganba-nanamalaga be-imakmaloed. Ar deyob-gusale, Bab-Jehová bemargi sae-itononikoed. Degidbali, geb yog-bemar-ogilogar imakoed.
5 ”Weyob we-dulemar-e-ibmar be imako:
E-bab-dummadse-ibmar-ogumakar-ukleged-aila ei be earo.
E-akwamar-islidikmalad ei be mamaro.
E-bab-dummad-bundor-Asera-e-wilub-sobaled be omukuo.
Degine, e-suar-nuchumar-e-bab-dummadga-imakbukwad bela soogi be ogumako.
6 ”Ar ade, bemar, be-Bab-Dummad-Jehováʼba dule-islidikmalad gumalad. Ar be-Bab-Dummad-Jehová bemar-susad, adi, dulemar-baigan-we-napneggi-bukmaladba bur bule na egadga bemar-imakegar.”
Bab-Jehová Israel-dulemar-susad
7 Moisés Israel-dulemarga sogdebalid: “Ar Bab-Jehová bemarbina-sogsadi, bemar-sunonikidi, bemar-ichesulidba bemar-sunonisulid. Ar bemar, dulemar-baiganba bur-ichee gumalad. 8 Ar Bab-Jehová bemar-sabedba bemar-sunonikid. Deginbali, be-dadganga ise-sogar-ibmar-imakoye-sogsadba bemar-sunonikid. Agala, Bab-Jehová, Egipto-e-rey-Faraón-negsemaidgi bemar-onosad. Sabsur-odurdakle-bukwamargu, gandikidba bemar-onosad.
9 ”Degisoggu, be wisgumar, be-Bab-Dummad-Jehová, Bab-Dummad gued. Bab-Dummad-innikigwad-degisadeguadid. Bab-Dummad dule-e-sabgudimaladgala, e-Igar-Mamaidba-nanadimaladgala, e-wagan-danimaloed-ugakaasega, e-Igar-Mesisadi bela ega sogedba imaked. Degine, e-sabgued-degisadeguad ega oyoged.
10 ”Bab-Jehová dule-isdar-e-dakeddi, obelodaed. Bab-Dummad we-dule-isdar-e-daked-odurdakosurdeeye sogsulid, yog sabsur-odurdakar imakdaed. 11 Degisoggu, emi-ibagi, an bemarga Bab-Dummad-Igar-Mamaid-uknaidba be nanadii gumarsun.”
Bab-Igarba-nanamaladgi nued binsalegoed
(Levítico 26:3-13; Deuteronomio 28:1-14)
12 Moisés Israel-dulemarga sogdebalid: “Ar bemar we-Igarmar-uklesadba daele, degine, a-sogedba be nanamalale, be-Bab-Dummad-Jehová bemar-ebo-Igar-Mesisadba bemarga ibmar-imakoed. Degine, Bab-Jehová ise-sogar be-dadganga-sogsad, an bemarga-ibmar-sogsad-imakedseye, ar deyob imakoed. Degisadegu bemar-sabgubaloed.
13 ”Be-Bab-Dummad, bemar-sabguoed, bemargi ise-nued binsaoed. Degine, dula-bukib-omelomai, mimmigan-bukidar-nikumai, bemar-imakoed.
Deginbali, Bab-Dummad be-dadganga-yar-ukoye-sogsadgi,
be-ibmar-diged gadi-sanmak bega imakoed.
Be-ibmar-gwag,
be-vino,
be-olivo-gwallumar gadi-niku bega imakoed.
Be-moli-bebe-nikamalad,
be-sibad-wawaadmar,
be-sibadmar,
gatik-mergumai bega imakoed.
14 ”Dulemar-baiganba bemargi bur bule ise-nued binsalegoed.
Bemar-abargi-gudimalad,
machereddibe, omedibe,
anagan-nikusuli guosurmalad,
bela anagan-nikadbi gumaloed,
degine, amba be-ibdurganmoga,
bela dula-nikuedbi gumarmogoed.
15 Be-Bab-Jehová uellegega bemar-imakosulid,
degine, Bab-Dummad Egiptoʼgi boni-dummagan-onosad-be-daksamalad,
bemargi a-bonigan-gwisguega imakosulid.
Bab-Jehová, we-boni-dummagan dule-isdar-bemar-dakmaladginbi yolegega imakoed.
16 Bela Be-Bab-Dummad-Jehová bega-dulemar-uknaid be ogilogo.
Melle be a-dulemar wile dako.
Melle be e-bab-dummadga-na-imakbukwad, be-bab-dummadga be imako,
ar ade, amar, be-Bab-Dummad-Jehováʼgi-aibanega bemar-imakoed.
17 ”Ar na be be-ulubgi sogdibe: ‘We-dulemar anmarba bur-ichesur mergued. Degisoggu, ar wede, ¿igi-saele anmar we-dulemar-onogosunna?’
18 ”Melle be we-dulemar dobguo. Nue be ebinsamalo, igi be-Bab-Dummad-Jehová, Faraón-imaksa, degine, igi bela Egipto-dulemar-imaksabali.
19 Be-ibyagwar be daksamalad,
igi be-Bab-Dummad-Jehová Egipto-yargi-bemar-onogegala,
ibmar-dummagan imaksa,
ibmar-wilubgan-gegerdaklemalad imaksa.
Ar na e-ganguedgi bemar-onos gusad.
Ar amba, be-Bab-Dummad-Jehová, bela dulemar-be-asabin-bukwamalad-be-dobe-itomaladi, deyobi imakbaloed.
20 ”Deginbali, be-Bab-Dummad-Jehová a-dulemargi burmar barmidagoed, a-dulemar-gudimalad bela obelogoed. Ar amba, a-dulemar bemar-idu-dukuye-sogmalale, amba bela amar-obelogoed. 21 A-dulemar-abin, melle be gwayo, ar ade, be-Bab-Dummad-Jehová bemar-abargi gudiid. Be-Bab-Dummad, dule-dummadid, dulemar bela a-Bab-Dummad-dobdamalad. 22 Ar be-Bab-Dummad-Jehová bemarga we-dulemar-bemargi-gwisgudamaloed bela bega yog-obelogar imakosulid, binna-binna-obelomai imakoed. Adi, melle ibdurgan-sapurbarmalad-ursirmaladi bemargi obinmalagar.
23 ”Ar be-Bab-Dummad-Jehová we-dulemar bemarga-ukoed, bela wemar-berguedse sabsur-wiogoed. 24 Be-Bab-Dummad-Jehová we-dulemar-e-reymargi-nakwega be-imakoed. Degine, bela a-reymar be we-yargi ogilogo, adi, melle dulemar bar egi binsamalagar. Dulemar bipisaagwale bemar-asabin gwisguosurmalad, bela be a-dulemar obelogoed.
25 ”E-bab-dummagan-ibmargi-sobarmalad bela be soogi ogumako. Melle be e-birgi-mani-nasiklealedbina, degi, e-birgi-olo-nasiklealedbina be sogmalo, degine, melle be sumalo. Ar abakalegi, isguega be-imakarmalale, ar ade, be-Bab-Dummad-Jehováʼba we-ibmarmar ibmar-isgana gumalad. 26 Deginbali, we-ibmar-isganamar, melle bipisaagwale, be-negse be sedmalo. Ar degiile, be ukabsalegoed. Bela-bela we-ibmarmar be isdar-dako, degi, be sae-dakbalo. Ar ade, we-ibmarmala wede ukabsalegaledid.”