85
Israel teteŋ gebe Anôtô taê walô êsêac
1 O Apômtau, aôm kômoasiŋ nêm launêŋ gamêŋ.
Aôm gôjam gêŋwapac, taŋ gêgôm Jakob naŋ ôkwi.
2 Aôm kôsuc nêm launêŋ biŋ ôkwi
ma gôsaŋ êsêacnêŋ geo samob auc.
3 Aôm kôpuc nêm têmtac ŋandaŋ tôŋ
ma gôwi nêm têmtac ŋalakoc siŋ.
4 O Anôtô, aêacma kêsiwaga, mêŋônam aêac sa êtiam
ma ôwi ôlim ŋakam aêacŋa siŋ.
5 Aôm oc gobe têmtac ŋandaŋ êndêŋ aêac endeŋ tôŋgeŋ me.
Aôm oc gobe ôê têmtac ŋandaŋ tôŋ elom-elom ma wakuc samob me.
6 Aôm oc ôkêŋ aêac asê aweŋ su êtiam
gebe nêm lau ôliŋ êpi êtu aômŋa êtiam me masi.
7 O Apômtau, ôtôc nêm têmtac gêwiŋ teŋgeŋŋa êndêŋ aêac
ma ôkeŋ aêac awê kaiŋ nêm moasiŋ.
8 Aê gabe jaŋô biŋ, taŋ Apômtau Anôtô tau kêsôm kêsa awa naŋ.
Eŋ kêsôm biŋmalô
gêdêŋ nê lau, gadêŋ nê lau dabuŋ,
taŋ sêmu dêndêŋ nêŋ lêŋ meloc êtiam atom naŋ.
9 Kêdabiŋgac gebe ênam lau, taŋ têtac eŋ naŋ, sa biŋŋanôgeŋ
gebe ŋawasi ênam aêacnêŋ gamêŋ auc.
10 Têtac gêwiŋ teŋgeŋŋa to biŋ ŋaŋêŋ oc sêwiŋ tauŋ.
Biŋgêdêŋ to biŋmalô oc sêmbôêŋ tauŋ.
11 Biŋ ŋaŋêŋ oc êpoa aŋga nom êpi êmêŋ
ma biŋgêdêŋ oc atuc kêniŋ aŋga undambê asap êmêŋ.
12 Apômtau oc êkêŋ gêŋ ŋajam
ma naŋ nom ŋanô esewec êlêlêc su.
13 Biŋgêdêŋ oc êmuŋ eŋgeŋ
ma biŋmalô oc êpuc eŋ waŋa. * Kora latui nêŋ pesalem teŋ.