67
“रिम्शो पाइतीनी” दे कुम्सो पशो
कुम्सो पपाइक्ब कली तार पाइश्शो ताप्तीके ताप्शा पतीक कुम्सो।
1 परमप्रभुमी इं कली शिशी पा आसीक गेवल। मिनु इं कली आ शिशी कोंइदल। ठेयब सेंदा पा।गन्ती ६:२४-२५ 2 रागी रागी ङा मुरपुकीमी इन लां नु इन प्रोंइतीक सक्ति तुइक्तमेक्ल।
3 परमप्रभु, जात जात ङा मुरपुकीमी इन कली ठेयब सेल्मेक्ल। मिनु मुर नेल्लेमी इन कली ठेयब सेल्मेक्ल। 4 रागी रागी ङा मुरपुकी ग्येरशा सोम्शा, कुम्सो पामेक्ल। मारदे हना गे जात जात ङा मुर आन कली कुल मकोव़थु निसाफ पाइनीनी। मिनु रागी रागी ङा मुर आन कली इन लां कोंइनीनी। ठेयब सेंदा पा। 5 परमप्रभु, जात जात ङा मुरपुकीमी इन कली ठेयब सेल्मेक्ल। मिनु जात जात ङा मुर नेल्लेमी इन कली ठेयब सेल्मेक्ल। 6 मिनु रूम अन्न ख्रेल्ब। इं परमप्रभुमी इं कली आसीक गेब। भजन संग्रह ६५:१० 7 परमप्रभुम, इं कली आसीक गेना गेन बाक्ब। मिनु रागी ङा मुर नेल्ले मेको कली मान पा हिंनीम।