1 परमप्रभु यावे, गो इन कली जिम्‍मा गेंसीशो बाक्‍नुङ। गो गेनायो मुने मदोक्‍ङल। 2 इन ठीक पतीकेम आं कली राइश्‍शा प्रोंइयीनी। आं लोव़ नेंशा, आं कली प्रोंइयीनी। 3 आं प्रोक्‍शा लशा ख्रुइश्‍शा बाक्‍तीके सेरथे फुल्‍लु दुमीन। गे आं कली प्रोंइचा कली ब्रोंइशा बाक्‍तीक दरवार बाक्‍नीनी। मारदे हना गे आं सेरथे फुल्‍लु नु आं ब्रोंइशा बाक्‍तीक दरवार बाक्‍नीनी। भजन संग्रह ३१:३-४ 4 आं परमप्रभु, गे आं कली इन अरेशो मटीब आन गुइ रे राइक्‍तीनी। ठीक मपाइब नु तुप्‍शा दिप्‍ब मुर आन गुइ रे राइक्‍तीनी।

5 मारदे हना परमप्रभु यावे, गे आं आस बाक्‍नीनी। गो आ ठिटा दुम्‍ङा रेन इन कली थमा सुइक्‍ता। 6 गो जरमेसीङा रेन इन कली थमा सुइक्‍ता। गे आं ममा आ कोव़ज रेन आं कली कोव़ब बाक्‍तीनी। गो इन कली गेना हना यो ठेयब सेल्‍नुङ। 7 शुश मुरपुकीमी आं कली तशा “परमप्रभुमी मेको कली ताइक्‍ताक्‍व” दे मिम्‍नीम। तन्‍न गे आं ख्रुइश्‍शा बाक्‍तीक बाक्‍नीनी। 8 गो इन कली गेना हना यो ठेयब सेल्‍नुङ। गो नाक्‍त रे इन नें ठेयब सेल्‍नुङ।

9 गो खूशो दुम्‍ङानु, आं कली मप्रोंइयीनी। आं सक्ति जाम्‍मेनु यो आं कली मप्रोंइयीनी। 10 मारदे हना आं जोरी सत्रुमी आं पर्बम मरिम्‍शो लोव़ पाइनीम। आं कली साइक्‍चा माल्‍बपुकीमी लोव़ गारपाइक्‍नीम। 11 मेकोपुकीमी “परमप्रभुमी मेको कली वारच पचा प्रोंइशो बाक्‍ब। मेको कली खेदा पा ग्‍याइक्‍तय। मारदे हना मेको कली राइक्‍ब सुइ मबाक्‍नीम” देंनीम। 12 परमप्रभु, आं क्‍येङा ङोन मबाक्‍कीन। आं परमप्रभु, आं कली राइक्‍चा कली रीब पा जाक्‍कीन। 13 आं कली दोस गेबपुकी मुने दोक्‍शा खतम दुम्‍मल। आं कली साइक्‍चा माल्‍बपुकी तोक्‍शा लोव़ पाइक्‍चा, शुक्‍शी पाइक्‍चा नु आइक्‍च सेल्‍चा पुंइसमल।

14 तन्‍न गो चहिं इन कली आस पस ङा पस बाक्‍नुङ। गो इन कली ङोंइती क्‍येङा ठेयब सेल्‍नुङ। 15 गो इन ठीक पतीके आ पर्बम लोव़ पाइनुङ। गे आं कली गिश खेयप प्रोंइ‍यीनी, मतुइक्‍ताक्‍ङ हना यो, गो इन श्‍येत रे प्रोंइतीके आ पर्बम नाक्‍त रे लोव़ पाइनुङ। 16 परमप्रभु, गो इन सक्ति पाइश्‍शो गेय आ पर्बम शेंना शेंन गाक्‍नुङ। मिनु इन ठीक पतीके आ पर्बम इन कली ठेयब सेल्‍नुङ। 17 परमप्रभु, गो ठिटा बाक्‍ङा रेन, गे आं कली शेंताक्‍यीनी। मिनु गो मुल सम्‍म इन छक लाक्‍चा ङा गेय आ पर्बम लोव़ पाइनुङ। 18 परमप्रभु, गो खूशो दुम्‍शा, आं चां बोइक्‍म सम्‍म यो, आं कली मप्रोंइयीनी। मिनु गो आं नोले ङा पाला ङा मुर आन कली इन सक्ति नु इन ठीक पतीके आ पर्बम शेंनुङ। यसैया ४६:४

19 मिनु इन ठीक पतीके ठेयब दुम्‍शा, इर सरीङ थीब। गे थम ठेयब गेय पाइतीनी। परमप्रभु, इन खोदेंशो अरु सु बाक्‍नीमी ङा? 20 गे आं कली शुश नु ठेयब श्‍येत जपाइक्‍तीनी हना यो, लेंशा ब्रोंइचा गेनीनी। गे आं कली लुक्‍च लतीक रे लेंशा ग्‍येत्‍थ लपाइक्‍नीनी। १सामुएल २:६ 21 गे आं कली लेंशा मान ताइब सेल्‍शा लेम्‍नीनी।

22 आं परमप्रभु, गो इन दाक्‍शा गेनायो मप्रोंइतीके आ पर्बम ठेयब तार पाइश्‍शो ताप्‍तीके ताप्‍शा, ठेयब सेल्‍नुङ। गे इस्राएली आन का ला परमप्रभु बाक्‍नीनी। गो बीना ताप्‍शा इन कली कुम्‍सो पाइनुङ। गे इस्राएली आन का ला परमप्रभु बाक्‍नीनी। २राजा १९:२२; यसैया ४३:३ 23 गे आं कली श्‍येत रे प्रोंइब बाक्‍तीनी। मोपतीके गो ग्‍येरशा सोम्‍शा इन कली कुम्‍सो पा ठेयब सेल्‍नुङ। 24 गो इन ठीक पतीके आ पर्बम नाक्‍त रे लोव़ पाइनुङ। मारदे हना आं कली खती पचा माल्‍बपुकी मुने दोक्‍शा, मार पचा ना मार पचा दुम्‍तेक्‍म।