138
Song Fo Tell God “Mahalo”
One David kine song
1 Eh Boss! I like go all out
Fo tell good tings bout you!
In front all da odda gods,
I goin sing bout you.
2 I goin face da Temple
Dat stay spesho fo you
Wen I go down fo pray.
Dis fo show you love an respeck.
I goin tell good tings bout you,
Cuz I know who you.
Cuz you erytime stay tight
Wit yoa peopo,
An cuz us guys can trus you
Fo do wat you tell you goin do.
Dass cuz you do wat you promise fo do,
An dass da mos importan ting
Peopo know bout you.
3 Weneva I yell to you fo help me,
You help me.
You make um so I no come sked
Fo do wat I need fo do,
Dass how you make me
Come strong inside.
4 Eh! You Da One In Charge!
Da king guys from all ova da world,
I like fo dem tell dat you da greates,
Wen dey hear da tings you tell.
5 Dass why dey goin sing
Bout how you do tings.
Dey goin tell: “Da One In Charge,
He stay real awesome!”
6 Eh! You Da One In Charge!
Fo shua, you importan,
But still yet, you see wass happening
Wit da peopo dat not importan.
An da peopo dat get big head,
No matta dey stay far,
You know wat dey stay do.
7 No matta get trouble ery place I go,
An da peopo dat stay agains me
Stay huhu,
You goin make shua I no mahke.
You goin show yoa powa
An bus dem guys up!
You get da powa
Fo get me outa trouble.
8 Eh! You Da One In Charge!
You da One
Goin make happen fo me,
Eryting you wen promise fo do.
You, Da One In Charge,
An you stay tight
Wit yoa peopo foeva!
So den, no go bag
From da peopo you wen make!