147
Song Fo Da God Dat Get All Da Powa
1 Eh you guys! Tell good tings
Bout Da One In Charge!
Cuz az good, you know,
Us guys sing fo oua God.
Az nice, we tell good tings bout him.
2 Da one dat stay build Jerusalem town
One mo time, az Da One In Charge!
He bring back togedda da peopo
Dat was prisonas Babylon side.
3 Wen dey stay real sore inside,
He make um come good one mo time.
Jalike he put one bandage
On top da place dat stay hurt.
4 Da One In Charge, he wen tink
How much stars he like make.
Den he make um.
An he give one name
To all dem fo talk to dem.
5 Oua Boss, he big!
He real strong!
He undastan mo plenny
Den us can undastan!
6 Da One In Charge,
Fo da peopo dat no ack big,
He help um.
But fo da peopo dat stay do wass wrong,
Jalike he throw dem down
On top da dirt.
7 Sing fo Da One In Charge,
Fo tell good tings bout him!
Make music fo oua God
Wit da small harp!
8 Da One In Charge, he da One
Dat make da clouds cova da sky,
An give da groun enuff rain,
An him da one dat make da grass
Come up all ova da mountains.
9 Da One In Charge, him da one dat give food
To da farm animals,
An to da bebe scavenja birds
Weneva dey yell fo food.
10 So, wat you tink make Da One In Charge
Feel good inside?!
You tink how strong yoa horses?!
O how fas yoa army guys run?!
O wat?!
11 Dis wat make Da One In Charge
Stay good inside:
Wen peopo get choke plenny respeck
Fo Da One In Charge,
Fo dem feel jalike dey sked
In front him,
An wen dey wait fo him help dem,
Cuz dey know he stay tight wit dem.
12 You Jerusalem peopo, tell good tings
Bout Da One In Charge!
You peopo dat go Mount Zion fo pray,
Tell good tings bout yoa God!
13 Da One In Charge make yoa town gates
Come mo strong
Fo da peopo dat stay agains you
No come inside.
All da peopo dat come from yoa town,
He make um fo dem do
Wat he like um fo do.
14 He make shua dat da peopo
Dat stay agains you
No come inside yoa land.
He give you da bestes kine wheat fo eat,
Fo you eat all you like.
15 Da One In Charge tell fo do someting,
Right den an dea, az jalike da earth
Lissen an do wat he tell.
16 Da One In Charge sen da snow
Jalike one blanket.
He put ice all ova da groun jalike dirt.
17 Da One In Charge throw down hail
From da sky.
Wen he make da cold storm come,
Nobody can handle dat, aah?!
18 Den, by da powa
A wat Da One In Charge tell,
He make da ice melt.
He make his wind blow,
An his watta flow inside da streams.
19 Da One In Charge, he da One
Dat wen tell da Jacob ohana peopo
Da tings he like fo dem know.
He wen tell da Israel peopo
(Dass da same Jacob ohana)
His Rules
An da tings he tell cuz he da judge.
20 He neva do notting lidat
Fo da odda peopos.
Dey neva find out da tings
Da One In Charge tell
Cuz he da judge.
Tell good tings bout Da One In Charge!