1 मियगा वासि मीक ओसो वने दुकम आनाह केवोन इनजोर उंदिय विचर कीतन, अदिह्‌क मियगा वावोन. 2 ननाये मीक दुकम आनाह कीतन इतेके मीटे नाक गिर्दा आनाह कीया पग़यकिर. 3 मीट नाक गिर्दा आनाह कीतेके, मीट वने गिर्दा आयकिर इनजोर, मीट सबेटोरा पोग़ोन नावा बर्वस मन्ह्‌ता. मति नना वातस्के, नाक गिर्दा आनाह कीयना वाटो, नाक दुकम आनाह कीकिर बहे इनजोर रेयतन. अदिनेनाह्‌क चट्‌पिट मियगा वावा मुने उंद सीटि लोहच मतन. 4 अद सीटि रासिह्‌पा, नावा जीवा चुहेम आयो मति वेल्‍लाय दुकमते, कनिर्क पोहच-पोहच रासतन. मति मीक नारज कीयलाह तान लोहोन, मीक पकाय जीवा कीतन इनजोर मीट पुनदना इनजि लोहतन.

5 मियग्डोग़ दुकम आनाह केवाल मन्कल, ओग़ नाके आयो; मति मीक सबेटोरिन वने दुकम आनाह कीतोग़, बोरिह्‌क एक्वा, बोरिह्‌क तक्वा. (ओना तप वीळिस तोहतलाह ऊळोन.) 6 मीवा मुडोर वेल्‍लाटोर मन्कलोर वेहचि ओन्क बेद सिक्सा ईतिर, अद इंजेके आस्ता. 7 अदिह्‌क ओना कसुरतुन मापि कीम्ह्‌टु, कीसि ओन माने कीम्ह्‌टु. इलवेके ओग़ पकाय दुकम आसि पूरा आसालेवप आयनोग़ बहे. 8 अदिनेनाह्‌क ओन निटम जीवा कीतिर इनजोर तोहचीम्ह्‌ट. 9 मुनेता सीटटे मीट ओन सिक्सा ईयलाह वेहच मतन. नना वेहतनव सबे पोल्‍लोन मीट केंजिह्‌निरा केंजविरा इनजोर ऊळलाह वने नना सीटि लोहच मतन. 10 मीट बोना बेदाय गल्तितुन मापि कीतेके, तान नना वने मापि कीय्ह्‌नन. बेदिनाय मापि कीतन, इतेके अद मीवा पाय्दातेनाह्‌क नना कीतन इनजोर किर्स्तु पुतोग़. 11 मापि केवेक अचोन देयह्‌कना मुक्याल माक एग़्किह कीस्ता. बह इतेके ताना सत्रलतनमतुन माट पुतले.

12 मीक अद सीटटुन रासतापया, नना किर्स्तुना बेसता कबुरतुन पोकुर कीयलाह तरोवस सहरते अन्ज मतन. अगा सामिना कबळ कीयलाहि, ओना मेटे नाक अग़ दोर्किस मता. 13 नावा ऐंगेटोग़ विस्वसि तीतुस वने अगा वासि मियकेडा कबुर ततनोग़ इनजोर अग़ ऊळसोर मतन. मति ओग़ अगा वावोग़; वावाह्‌कु नावा जीवा चुहेम आयो. जीवा चुहेम आयवाह्‌कु नना तरोवस सहरतोरिन दाय्ह्‌नन इनजोर वेहचि, मकिदुनिया पटटे अतन.* 2:13 2:14 इग्डाहि 7:3 एवनाह तीतुसना पोल्‍लोतुन विळ्सिसि, पोलु तनाय सेवाता लोप्पा वेल्‍लाङे पोल्‍लोन तेळियिह कीस वेहतह्‌तोग़.

14 देवुळतुह्‌क जोहर आयि! अद माट सेवकिरिन तना गेल्समुळते किर्स्तुना संगे पोत्ला आयलाह कलियिह कीता. ओसो बेद्रम अतर्नेयता गब बेके अतेकाय गम-गम एग़्स्किह्‌ता, अद्रम माट बेके अतेकाय मावा पोल्‍लोतुन केंजवालोर मन्कलोरगा किर्स्तुन पुनाह कीस्ता. 15 इतेके गम-गम एग़्स्कनद गबता लेह्‌कान आतोम, किर्स्तु माक देवुळतेनाह्‌क दूपम उंडिह कीयना लेह्‌कान आतोम. गबु पूरा गमरेम आयना लेह्‌कान, देवुळतुन विस्वस कीसि पिसवालोर वने, विस्वस केवा तानग्डाह जेक आयवालोर वने, माट वेहतस्के किर्स्तुना पोल्‍लोतुन केंजिह्‌तोर. 16 विस्वस केवा देवुळतग्डाहि जेक आयवालोरिह्‌क मावा पोल्‍लो हामुरता गबता लेह्‌कान आस्ता. किर्स्तुन विस्वस कीस पिसवालोरिह्‌क बारा पिसनदिना गबता लेह्‌कान आस्ता. मति देवुळि लाव एवेक अचोन, इद्रम ताना कबळ कीयलाह बोग़े लायक इलोग़. 17 वेल्‍लाटोर नाळेह केवालोर माट लायकतोरोम इनजि, तम्क पाय्दा दोर्कि इनजोरेने देवुळता पोल्‍लोतुन पोकुर कीस्तोर. माट बार अद्रमतोरोम आयोम. देवुळिये माक इद कबळ कीयलाह लोहता. माट ताना मुनेह सेतेमते पोकुर कीय्ह्‌नोम, किर्स्तुना अदिकरते वळ्ह्‌किह्‌नोम.