1 Pamahmahsan ta o Dios, ta oyod sia a mapia. No addaw na am machipanda ava. 2 Vatan sia no tawotawo do Israel am, “No addaw no Dios am machipanda ava.” 3 Vatan da pa sia no papali no Dios, “No addaw no Dios am machipanda ava.” 4 Maytavo a sominchad sia o omdaday sia a makavata sia, “No addaw no Dios am machipanda ava.”

5 Do kaoyod na rakoh no pannganngan ko am tomnawag ako do Dios. Nitbay na yaken as kalibri na diaken do pannganngan kori. 6 No Dios o somidong diaken as arava o ichamo ko ta ara paro o mapaparin no tawo diaken? 7 Makayamot ta no Dios o somidong diaken am mahomis sa anti o komontra diaken. 8 Mapipia o kasaray ta no Dios as kano kasaray ta no tawo. 9 Mapipia o kapachidepende do Dios as kano kapachidepende do manyokoyokod sa.

10 Atavo o nasiones a minkontra diaken amna nihomis ko sa do ipakapamarin no Dios. 11 Komnadivon sa diaken as katetek da diaken amna nihomis ko sa no ipakapamarin no Dios. 12 Akma say tapipi a komnadivon diaken amna akma say kadibobotan a malisto a kasosohan. Do ipakapamarin no Dios am nihomis ko sa. 13 Oyod a mahara o kalaban da diaken as homisen darana yaken amna nahomis sa takwan no Dios o somidong diaken. 14 No Dios o tomoroh diaken so ayet kano ipakapamarin a manghomis. Iya o yanan no kalibrian ko.

15 Madngey do kakpehan da no manamonamo so viay o kapangyaw da no kasoyosoyotan kano kapanghomisan takwan oyod a makapamarin o tanoro no Dios! 16 Pamatohen ta o Dios do makapamarin aya a tanoro na. Oyod a makapamarin o tanoro naya.

17 Madiman akoava anti asna maviay ako pa a mapapanmo nia o makakniknin a pinariparin no Dios. 18 Aran oyod a mahara o nakapaynananawo na diaken no Dios amna ara nava yaken a nakanonolay a madiman.

19 Iwangan mo o ayeran no templo tapian somdep ako a mamahemahes kano omdaday so Apo taya. 20 No ayeran aya am mangwan ya do mismo a yanan no Dios as moyvoh sira o manamonamo dana so viay o maparin so somdep. 21 Pamahmahsan koymo takwan sinidong mo yaken. Imo o yanan no kalibrian ko.

22 No Bato aya a chinaskeh da serbien no mapatnek so vahay am nayvadiw a maimportánte dana ta nia o soyid na. 23 Niaya am pinarin no Apo taya as oyod a makakniknin! 24 Ay so pakakniknin no araw aya a tinoroh na diaten as masoyosoyot ta a mamahemahes!

25 Apo a Dios am sidongen mo yamen as librien mo yamen. Parawaten mo sa diamen o ichakey namen a matodah.

26 Mabendito o mawara do ngaran no Apo ta Dios! As do templo mo am bendisionan namen paymo. 27 No Apo ta am Dios a iya so oyod a mapia diaten. Machangay ta a mangay do altar na do kapamato kano kadaday ta sia no vohovohong a iyanib sia.

28 Imo o Dios ko as pamahmahsan koymo. Ipapanmo ko anti o pakaknikninan moaya.

29 Mamahemahes ta do Dios takwan oyod sia a mapia! No addaw na am machipanda ava!