1 Do kaoyod ko na madispresio am machisiasi ako dimo mo Apo. 2 Adngeyen mo o katanyis ko a mangahes so kasisien as katbay mo diaken. 3 Ta an akmay mavidin mo a tovidan mo Apo o gatogatos namen am ara paro di kakastigoan? 4 Amna mapakabo ka so gatos dawa imo o sincharan as anohdan namen a rakoh so kanib dimo.

5 Nawri o pakayapoan no ichasoyot ko a omnanaya so promisa mo sa a kasidong mo diaken as no chirin mo am ichasaray ko. 6 Oyod a rakoh o kapanaya ko dimo, O Dios, ta makapachikompara ava ya do kapanaya sia no asa ka gwardia o kapaysehsehdang narana.

7 Inio a Israel am ichasaray nio o Dios takwan no Dios o rakoh so addaw kano kasisien as fermi a makey a manlibri. 8 Librien na sa anti o atavo a tawo no Israel do atavo a gatogatos da.