1 Kamaina bi oloto bi waivini tedi Livai damna bi taudiḡa ai ka naḡinaḡi. 2  ✡ Giu 7:20Waivinina i bwaga bi i laubewa te gomana olotona i bewa. Laḡannemo i kita te gomana kitana i visu gulata, tana kandavonemo i labe te nawalai faiona a kovi. 3 Laḡannemo tana mayana i vai te mote ḡemoḡemotina te gomana kandavonemo ima labe, aubaina te tana dou gulegulewemo a vatuvatulina i vai bi patimo nopona i pati kaukauwe te mote gauba ima sola saḡa. Kamaina bi gomana i vai te dou noponemo i suveki bi ḡawaḡawa nopodimo Naelo gaubinemo i waipoule. 4 Bi gomana nuvuna gauba diyanemo lau manemanekemo i moito bi i wai kita wata te gomana lisinemo bai ya tubuḡa.

5 Kamaina bi ḡalibona natuna waivinina i nawa Naelo gaubinemo asiwa aubaina. Bi ena taupaula labu gauba diyanaḡa a moimoito nawa. Kamaina bi i wai kita nawa te dou ḡawaḡawa nopodimo i kita bi ena taupaula ḡemota i giuwe te ya vai natome. 6 Ḡalibona natuna waivinina dou kuvuna i kailageti bi i kita te gomana. Bi gomana i ḡabaḡaba te i launuwatoiye bi i giuna gado, “Niga ba Ḡibulu gomenina.”

7 Kamaina bi gomana nuvuna ḡalibona natuna i waitalayena gado, “Ḡemoḡemotina maso e nawa Ḡibulu waivinina ei doli tavaite bi gomana i waisusu aubaim ee?”

8 Bi tana giu i wai munena gado, “Emaso, ku nawa!” Kamaina bi gomana nuvuna i nawa te tinaotina i wai doli tavaite. 9 Kamaina bi ḡalibona natuna waivini i giuwena gado, “Niga gomenina aubaigu kwai susu bi yài mai'im.” Kamaina te waivini gomana i vai bi i wai susu. 10  ✡ Giu 7:21Laḡannemo gomana i seda mulinemo ba waivini gomana i nawe ḡalibona natuna i vite te i wainatunae. Bi ḡalibona natuna i giuna gado, “Niga gomenina gaubemo e solu lageti, aubaina isana Mousis.”

11  ✡ Giu 7:23-28Laḡannemo Mousis i dididiga tana i nawa ena lava mani Ḡibulu i va kitekitedi. Ḡome i kita te Idip lavedi ena lava a egelidi bi noya vitevitedi a voivoiyedi. Ḡome tana Idip lavana i kita te Ḡibulu olotona ḡemota i katikativunu. 12 Mousis i wai laulau kita te mote aiyai bamo, kamaina bi tana Idip lavana i lai peki, bubu i wai sula sala te i ḡuluvi.

13 Bokinamai Mousis i munaḡa ena lava lisidimo bi i kita te Ḡibulu oloolotodi a wai ḡasiḡasi. Kamaina bi waiḡasiḡasi tauwaitubuna i waitalayena gado, “Bai aubaina falom Ḡibulu kwa katikativunu?”

14 Ḡome olotona i giuna gado, “Tam aiyai ḡailisi i vitem bi kwa waibadaemai? Tam kuna ḡoeḡoena tagu kwai pekigu, mai maḡo Idip lavana kuna waipekina, ee?” Ḡome Mousis i naila bi i wai noḡotana gado, “Bai e voivoiyena gode lava matabudi kaikana a sibe.” 15  ✡ Giu 7:29 Ḡalibona laḡannemo Mousis giuna i vaiye ba i ḡoeḡoe te Mousis maso i waipeki bi geḡa te Mousis i velau ḡalibona i gose kamaḡe bi i nawa Midian.