14
Laḡannemo Loti Sodom malagainemo i miyamiya bi ḡalibona 4 edi tauwaiḡaviya vaitedi a tava. Bi Sodom malagaina bi malagai ḡesaudi diyanemo vaitedi a suludi. Bi tedi Sodom ena tauwaiḡaviya a lauyovoḡedi.
Loti a pani nawe bi kota Ablam i natome munaḡe
11-12 Ḡalibona wapedi 4 edi tauwaiḡaviya vaitedi a tava Sodom bi Gomola malagaidimo bi lava edi pulapula, kediya bi kota Ablam madiyana Loti vaitena a pani bi a nawedi. 13 Bi ḡome oloto ḡemota i soyavai te i velau Ablam lisinemo bi bai matabuna i tubutubuḡana i tainuwatau. Ablam tana Ḡibulu lavana bi Mamle ena kaipolu diyanemo i miyamiya. Bi Mamle tana Amoli lavana. Mamle tasitasina Eskol bi Ane, Ablam vaitena waianina a voiye, te sai kaisagu bi edi ḡaviya sai ḡaviyedi. 14 Laḡannemo Ablam i vaiye te madiyana Loti a pani. Tana ena tauwaiḡaviya wapedi 318 i wai ḡemotidi ena ḡalavumo bi ḡalibona wapedi 4 a kwavi watedi te Den malagainemo a tavaitedi. 15 Ḡome ena tauwaiḡaviya i dailidi edi dubuḡa bi dudubalemo edi ḡaviya a yovoḡedi bi a kwavidi a nawedi te Ḡobamo a tavaitedi. Ḡoba ba Damaskas kavalinemo, 16 bi pulapula danedanenedina a tanodi bi kota Ablam madiyana Loti bi ena pulapula matabudi, vesavesala bi lava ḡesaudi vaitedi a munaḡedi.
Melkisedek Bada i wai baḡa te Ablam ya kavisuvisu
18 Melkisedek ba Salem edi ḡalibona bi tana kota Bada saḡasaḡa guletina ena pilisi,* Niga pilisina mote mai niganana pilisidi. Wala pilisidi ba lava edi puyo taugabudi. tana buledi bi waen i tano natomedi Ablam i vite. 19 Bi tana Ablam i kavisuvisu bi i giuna gado,
“Giukauwa te Bada saḡasaḡa guletina,
mala bi dobu tauvoiyedi, kauwa visuvisudi i voiyedi lisimmo.
20 Giukauwa Bada saḡasaḡa guletina
i sagum te em ḡaviya ḡalibona 4 kuna lauyovoḡedi,
taunana aubaina te ta kasaḡesaḡe.”
Bi waiḡasiḡasi mulinemo Ablam pulapula i tanodi bi dubu 10 i sivudi bi dubu ḡemota Melkisedek i vite.