1 Bi Idip lavana isana Potipa tana Ismael lavedi lisidimo Diyousep i gimeli bi i nawe ena vanuwemo. Potipa tana tauyava edi bada bi Idip ḡalibonana ena waibada gabulinemo i noyanoya.

2  ✡ Giu 7:9Bi Diyousep ena yawasanamo Bada tana vaitena bi mwali matabudi i voivoiyedina ba didimanidi a tubutubuḡa. Bi Idip lavana Potipa ena vanuwemo i miyamiya. 3 Ḡome Potipa Diyousep i kita te Bada tana vaitena bi bai matabudi i voivoiyedina ba didimanidi a tubutubuḡa. 4 Taunana aubaina Potipa i wai anine te i sako ena taupaula bi ena vanuwa noponemo mwali matabudi yai badayedi. 5 Diyousep dabanemo, Potipa ena vanuwa lavedi, vanuwa ḡoneḡonedi matabudi bi edi daibimo mwali matabudi Bada i kavisuvisudi. 6 Kamaina bi Potipa mwali matabudi Diyousep nimanemo i sivudi te ya kitawatedi bi Potipa tana ya miya bi ya kani ota.

Bi Diyousep ba ewali laukaina bi ḡaiḡailisina. 7 Bi mote lofana te Potipa mwanena Diyousep i kita olotoe bi i wai baḡa te maso vaitena a kena.

8 Bi Diyousep i daboka bi waivini i giuwena gado, “Tagu egu bada mote bai ḡesau ima wainuwaboyae bi mwali matabudi i wai taniwagaedina tagu nimagumo i sivudi te yai badaedi. 9 Bi mote aiyai niga vanuwina noponemo isaḡa gulata te mai tagu. Bi egu bada i waisumaḡegu bi mwali matabuna i wai aninedi te tagu yai badaedi bi tam ḡemotim mote i wai aninem banina tam ba mwanena. Bi bai aubaina tagu maso gebo e voiye bi Maimaituwa ei nuwaboya.” 10 Potipa mwanena laḡan matabuna Diyousep i laulau yaviyaviye te maso vaitena a kena. Diyousep tana i dabodaboka bi mote diyanaḡa i nawanawa.

11 Kamaina bi laḡan ḡemota Diyousep i nawa vanuwemo noya aubaina bi ḡome mote taupaula ḡesauna vanuwa noponemo i miyamiya. 12 Ḡome Potipa mwanena Diyousep ena gala dabanemo i kotekotena kaididi bi i giuwena gado, “Kwa nato ta kena!” Bi Diyousep i daboka bi i naila vanuwa i lau potiyovo kamaḡe. Bi Potipa mwanena Diyousep ena gala i solu kamaḡe bi i kaididi.

13 Laḡannemo waivini i kita te ena gala nimanemo i kena gwasa, 14 ba i galala ena taupaula lisidimo. Bi i giuna gado, “Niga Ḡibulu olotona ko kita, tagu mwanegu i tavaite bi yawasana wai dabaubaubana i voiye. Tana egu ani kenamo i saḡa bi i ḡoeḡoena maso i lau waiviniyegu bi tagu e miya binabinau. 15 Laḡannemo tagu i vaiyegu te sagu aubaina e binabinau ba ena gala diyagumo i gose kamaḡe bi i velau i potiyovo.”

16 Ḡome waivin Diyousep ena kwama i kaikaididina eete mwanena i tava munaḡa. 17 Kamaina bi waivin bai i tubutubuḡana mwanena i tainuwatauna gado, “Niga taupaulina Ḡibulu olotona kuna tavatavaitena, tana egu ani kenamo i saḡa bi kauwa wai dabaubaubana lisigumo i voiye. 18 Bi tagu sagu aubaina e binabinau ba ena gala diyagumo i gose kamaḡe bi i velau i potiyovo.”

19 Sauginemo Diyousep ena bada tava ba mwanena i giuwena gado, “Kwai beyavaiya, em taupaula niga mainana lisigumo i kauwa.” Potipa nuwana i medi kauwa Diyousep lisinemo.

20 Kamaina bi Potipa Diyousep i pani bi biliwelokomo i sako nawe, ḡalibona ena panipani lavedi a miyamiyanemo. 21  ✡ Giu 7:9Bi Bada tana Diyousep vaitena bi i laukivivisuvisuwe bi i labe kauwe. Taunana aubaina Diyousep kauwa visuvisudi biliweloko tauyavena lisinemo i voivoiyedi. 22 Aubaina biliweloko tauyavena waibada i vite te biliwelokomo lava ya labedi bi noya matabudi yai badayedi. 23 Bi biliweloko tauyavena mote Diyousep i giu watawata banina Bada tana vaitena bi mwali matabudi i voivoiye kauwedi.