55
Maimaituwa ena launuwatoi puyona
1 Bada i giuna gado, “Temi mabai gadomi magumagudi,
ko nato gauba ko tego,
bi wai mane geḡemi,
ko nato ko gimala bi ko kani.
Ko nato waen bi miluki ko gimala, maiidi geḡa.
2 Bai aubaina mwali mote anikani,
lisidimo mane kwa waiyakali?
Bi em noya mote matailina,
Kalinagu ko vaiyena kaka,
kani visuvisuna ko kani,
bi koi nuwavisuye,
mote mai kani ḡesaudi.
3 ✡ Giu 13:34Ko nato lisigumo beyemi ko kaikamaḡe
bi koi beyavaiya komakomani kaka yawasana ko vai.
Bi egu waianina kenakena nonoḡina lisimimo yà voiye,
bi Deivida lisinemo kavisuvisu e giugiuwapaena yà vitemi.”
6 Taugiuwatana i giuna gado, “Bada ko tavuḡe bi lisinemo ko
laupali sauginemo tana diyademo.
7 Emi yawasana bi emi
noḡota balebaledi ko vitaledi.
Ko nuwavitala Bada lisinemo,
bi Maimaituwa ya launuwatoiyemi
bi emi gebogebo ya noḡoti kamaḡedi.”
8 Bada i giuna gado,
“Egu noḡota mote mai temi emi noḡota
bi egu kauwa ba tabu otidi mote mai temi emi kauwa.
9 Giukauwa te galewa i saḡa gulatana kaka dobu,
kota mainana egu kauwa bi egu noḡota
a tausaḡana kaka temi.
10 Galewaḡa nabu bi taumata ya yovoyovona dobumo
te doḡa yawai utuvi.
Bi pesi ya voiyedi te sa duga te sa laubani
te kani anikani bi pesi aniwadi.
11 Kota mainana mudugumo giu ya potipotiyovona
mote banina imai geḡa.
Tagu bai e noḡonoḡotina luvanemo mainana
mwalidi matabudi sa tubuḡa.”