61
Bada giuna visuvisuna lava waiyamoyamonidi aubaidi
bi buyobuyo dabagumo i ḡini te giuna visuvisuna,
wai yamoyamonidi lisidimo yà lauguguyae.
Te nopodi loleloledi sa yawasana,
bi panipanimo miyemiyedi yà kuvesidi
bi lava biliweloko wai dudubalinemo
sa miyamiyana sa potiyovo.
2 ✡ Met 5:4Tana i giukamaḡegu te yà lauguguya
banina laḡan i tava,
te Bada kaka kana ḡaviya ya lauyovoḡedi,
bi ena lava yai yawasanidi.
Tana i giukamaḡegu te wai nuwaboyedi yài nuwaubedi.
3 Bi lava wai nuwatoitoidi Saiyonmo a wai kovutopedina yà sagudi,
bi yài siyedi,
te a wai nuwaboyana ba sa yasisi
bi nuwa kulukuluvidi ba nuwavisu yài lautawidi.
Bi edi kauwa sa didimana,
maibena kai visuvisudi Bada i wadiwadidina.
Bi bai i voivoiyena lava sa kita bi sa kasaḡesaḡe.
6 Temi sai isemina Bada ena pilipilisi,
bi Maimaituwa ena taupaula.
Dobu edi waiguyau temi
koi nuwavisuyedi bi ko laubabada te emiya.
8 Bada i giuna gado, “Tagu didimana yà ḡoeḡoe,
danene bi kauwa yabayababa e daboke.
Egu lava aubaidi visu yà voiye
bi waianina lisidimo e voivoiyena ya kena nonoḡa.
9 Bi dobu matabudi sa sibedi
bi sa viviledi te Islael lavedi edi tubulelesa ba e kavisuvisudi.”
10 Yelusalem lavemi ko yasisi te aubaimi Bada bai i voiye.
Maibena waivini naḡi aubaina ya waisiyana.
Mainana kota Maimaituwa mba waivinina
yawasana waisiyanemo i waisiya.
11 Maibena daibimo doḡa pesi ya voiyedi te sa dugadugana,
mainana Bada wailewapanina
ena lava dobu matabudimo ya voiyedi
te sa kasaḡesaḡe.