2
Yona Yana Kawanunuku
1 Iyana manawanei Yona i kawanunukuwa yana Guyau Yave nenei i bwaduwa,
2 “Yave yo, kaku dauna nakasina sinenei a bwauwa neneweu
eketa ku vinowanikuwa.
Matematesi yasi kabaḡa sinenemokenei ovivita fasinei a bwediya
keta ku nowanikuwa.
3 Katudomu nenei ku tewesobuwikuwa
eketa a gavivina ogodibuwai.
Nokomai gibo i toḡafifinikuwa
keta ka yoyo kitagoyosi matatafusi si nutautaunikuwa.
4 Eyo a bwaduwa, ‘Kwaḡa ku kitateweikuwa,
eatu ya Numa Kodukodu tafutafuna ana kita-savaviniya.’
5 Gibo i nutautaunikuwa keta i visubanikuwa,
ogodibu i tewefifinikuwa,
keta debabouku dodomu nenei i sumiya.
6 Koya kikwanakwanamisi venemokena nenesiyai a kenogamomona,
fwayafwaya kasi kawa dawadawanafota-vaḡasisi nenesiyai.
Atu kwaḡa o Yave yaku Guyau,
ogodibu sinenei ku sinanakasikuwa na yawasiku.
7 Tovanama a kamukonikuwa yawasiku i kakakaviya,
Yave a tukuwa.
A kawanunukuwa keta
ya Numa Kodukodu tafutafuna nenei ku nowanikuwa.
8 Aviyaonana kifukifufuna nenesiyai si kodukoduwa,
kasi nuwagabubu fakwafakwa-vaḡasina neneweu si vikwauteweiya.
9 Atu iyau o ana osedavadava yota ana vibwanaoseya neneweu.
Eketa yaku bwadudabadaba ana fufuniya neneweu.
Gifafafana o kwaḡa Yaveḡa neneweu!”
10 Eketa Yave iyana i visimeiya keta Yona i kanasiwaiya numagamai.