Salmo 12
12
Makaetek Di Ipogaw Ngem Matalek Si Diyos
1 Sik-a ay Diyos, bomadang ka koma,
tan nay enggay magay nalinteg di ogali na,
magay matalek si olay esa.
2 Am-in ay ipogaw, man-asieetek da.
Kaman mayat din kali da ngem baken baw tet-ewa.
3 Apo, paginkem et koma din mangpaspasablog si ib-a da
ya mangit-it-ek si awak da.
4 Kanan da, “Babaen sin kali mi, magon-od mi di layden mi.
Ibaga mi di layden mi,
magay makaipasaldeng en dakami.”
5 Ngem kanam, Apo, “Man-gonayak ed wani,
tan mapalpaligat ya manbaybayeweng din kakkaasi.
Idawat ko en daida
din talna ay an-anapen da.”
6 Apo, matalek ka sin insapatam.
Din karim yan palata di ena kaiarigan,
ay namin pito ay nalinisan.
7-8 Am-in ay soli, likeden din mangam-amag si lawa,
say it-it-ek di kaipoipogaw din kaloloya.
Ngem sik-a ay Diyos, kanayon ay somalaknib ka
sin ipogaw ay sana.