1 Ra Luluai i ki na king; boina ba ra lavur vuna tarai diat a dadadar;

I kiki ta ra ul a angelo; a gunagunan i guria.

2 Ra Luluai i ngala ta ra gunan Sion,

I ki ak ta ra lavur vuna tarai.

3 Boina ba diat a pite pa ra ngala na iangim, a enana ta!

I lia kakit.

4 A dekdek i ra king i mainge ra takodo na varkurai;

U vatvatur ra varkurai i varogop,

U tar pait ra dovot na varkurai ma ra mangamangana takodo pire Iakob.

5 Avat a pite vangala pa ra Luluai kada God,

Ma avat a va timtibum ta ra ruarua na kauna;

I lia kakit.

6 Moses ma Aron diat ma kana umana tena tinabar,

Ma Samuel livuan ta diat dia kail upi ra iangina,

Dia kail upi ra Luluai, ma i torom ta diat.

7 I ga tata ta diat ma ra bakut;

Dia ga torom ta kana lavur vartuluai, ma ta ra varkurai ba i tar tul tar ia ta diat.

8 Luluai kaveve God, u tar torom ta diat;

U God, u ga pupun vuai pire diat,

Ma a dovotina u ga obo pa kadia mangamangana.

9 Avat a pite vangala pa ra Luluai, kada God,

Ma avat a lotu ta kana luana gomgom;

Tago ra Luluai kada God i lia.