1 ᤌᤡᤰ ᤕᤧᤴ ᤕᤧᤛᤢᤖᤧ ᤔᤠᤱᤜᤡᤶᤔᤥ ᤏᤡᤛᤠᤶ ᤜᤢ᤹ᤖᤢᤛᤡᤖ ᤛᤢᤏᤠᤀᤡᤱ ᤀᤡᤱᤓᤴ ᤆᤥᤃᤢᤖ ᤕᤠᤃᤧ॥ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ ᤔᤧᤍᤩᤧᤀᤠᤱ 2 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢᤖ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹᥅ ᤁᤴ ᤕᤢᤰᤁᤡᤴ ᤜᤠ᤺ᤳᤗᤧ ᤁᤧᤒᤡᤖᤧ᥅ ᤀᤠᤔᤧᤳᤋᤧ᤹॥”

3 ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤗᤳᤇᤠ ᤛᤣ᤺ᤴᤗᤠᤵᤌᤡᤰ ᤛᤣ᤺ᤴᤍᤥ᤺ᤏᤡᤱᤗᤥ॥ 4 ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤔᤠ ᤁᤢᤕᤢᤰᤁᤡᤴ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤒᤡ. ᤀᤡ ᤔᤏᤠᤗᤠᤶᤒᤡ᥅ ᤀᤠᤔᤧᤳᤋᤧᤶᤔᤧ᤹᥄”

5 ᤂᤧᤱᤜᤠ᤹ ᤂᤢᤏᤡ᤹ ᤗᤢᤶᤔᤥ ᤐᤠ᤺ᤴ ᤔᤧᤎᤰᤋᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ‘ᤏᤡᤱᤘᤠ᤹ᤑᤢᤔᤠᤱᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤌᤣᤀᤠᤱ ᤏᤛᤠ᤺ᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤛᤣ᤺ᤴᤀᤠᤗᤠᤵ॥ 6 ᤁᤖ ‘ᤔᤏᤠᤜᤠ᤹ᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤔᤏᤠᤜᤠ᤹ᤖᤧ ᤀᤠᤏᤡ᤹ ᤗᤢᤱᤅᤡᤸᤗᤧ ᤀᤠᤶᤒ᤺ᤳ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤢᤜᤢᤴᤏᤠ᤺ᤱᤃ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤏᤡᤛ᤻ᤛᤣᤀᤣ ᤔᤧᤀᤡ᤺ᤳᤋᤢ᤹ᤖᤥ॥” 7 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤏᤡᤃᤧ ᤔᤧᤏᤡ᤺ᤛᤢᤶᤒᤧᤴᤗᤥ॥”

8 ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤂᤧᤴ ᤀᤡᤱᤃᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥”

9 ᤕᤧᤛᤢᤖᤧ ᤔᤏᤠᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ. “ᤀᤢᤴᤇᤣ᤺ᤴ ᤔᤏᤠᤎᤡᤰᤗᤧ ᤗᤳᤇᤠ ᤀᤡᤰᤁᤥ ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤢᤀᤠᤱ ᤁᤢᤓᤪᤧ᤺ᤱ ᤗᤰᤁᤥ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤀᤡᤰᤔᤛᤠᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤕᤖᤡᤰ ᤕᤧᤶ ᤌᤠᤖᤡᤰ ᤘᤣ᤹ ᤗᤠᤈᤣ᤹ᤀᤥ ᤐᤣ॥ 10 ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤋᤩᤧ᤺ᤸᤗᤧ ᤁᤢᤗᤰ ᤗᤠ᤺ᤛᤧ ᤁᤢᤛᤣᤘᤠᤖᤥᤒᤠᤎᤡᤰ ᤀᤡᤰᤔ᤺ᤒᤠᤜᤠ᤹ᤖᤥ ᤐᤠᤱᤄᤢᤖᤥ॥ ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤂᤢᤏᤧ᤹ᤃ ᤔᤧᤜᤡᤵᤋᤢᤀᤠᤱ ᤌᤣᤀᤠᤱ ᤔᤧᤶᤒᤡᤀᤣ ᤜᤠᤒᤠ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥ 11 ᤜᤧᤰᤁᤩᤠᤱ ᤕᤠᤶᤔᤥ ᤏᤡᤛᤡᤃᤣ᤺ᤰᤐᤠ ᤛᤣᤘᤠᤖᤥᤒᤠᤴ ᤗᤰ ᤋᤠ᤺ᤰᤛᤧ ᤐᤠᤱᤄᤢ. ᤁᤖ ᤂᤧᤴᤏᤠᤱ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤔᤧᤜᤡᤵᤋᤢᤖ ᤁᤢᤈᤠ᤺ᤳᤌᤡ ᤔᤧᤍᤣ᤺ᤛᤢᤀᤠᤱ ᤁᤢᤄᤠᤗᤧᤶ ᤔᤧᤒᤠᤱᤄᤢ ᤔᤧᤍᤣ᤺ᤛᤢᤖᤥ॥ 12 ᤕᤠᤶᤔᤥ ᤀᤠᤸᤗᤛᤠᤱ ᤛᤢᤶᤛᤡᤃᤣ᤺ᤰᤐᤠ ᤁᤢᤛᤣᤘᤠᤖᤥᤒᤠᤴ ᤗᤰ ᤋᤠ᤺ᤰᤛᤧ ᤐᤠᤱᤄᤢ. ᤁᤖ ᤂᤧᤴᤏᤠᤱ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤔᤧᤄᤠ᤺ᤴᤍᤢᤀᤠᤱ ᤔᤧᤏᤠ᤺ᤳᤋᤢ ᤔᤧᤍᤣ᤺ᤛᤢᤖᤥ॥

13 ᤀᤠᤸᤗ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤴ ᤏᤡᤱᤘᤠ᤹ ᤀᤡ᤺ᤳᤇᤡᤱ. ‘ᤀᤡᤱᤃᤠ᤹ ᤌᤣ ᤆᤥᤃᤢᤱᤒᤠᤒᤣ᥅ ᤀᤠᤸᤗ ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛ᤻ᤛᤠ᤺ᤴ ᤐᤠᤱᤄᤢᤱ॥ ᤂᤢᤏᤧ᤹ ᤔᤧᤏᤡ᤺ᤛᤢᤀᤠᤱᤃ ᤁᤢᤏᤠ ᤔᤧᤛᤠ᤹ᤖᤢᤒᤡᤗᤠ॥’

14 ᤁᤖ ᤂᤧᤴ ᤀᤡᤰᤔᤛᤠᤒᤠᤜᤠ᤹ᤖᤧ ᤂᤧᤴ ᤁᤢᤛ᤻ᤛᤠ᤺ᤴ ᤔᤧᤏᤡ᤺ᤛᤢᤀᤠᤱ ᤀᤡᤱᤔᤧᤍᤱᤄᤢ. ‘ᤁᤴ ᤁᤢᤶᤒᤠᤖᤧ ᤁᤢᤗᤰ ᤁᤧᤄᤥ᤺ᤒᤠᤖᤥ. ᤁᤴ ᤛᤧᤖᤢᤶᤔᤠᤱ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤜᤢᤰᤁᤠᤵᤐᤠᤛᤡᤖᤥ॥’ 15 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤁᤢᤛ᤻ᤛᤠ᤺ᤴ ᤆᤧᤸᤗᤧᤰᤛᤣ᤹ ᤀᤡᤰᤁᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢ ᤔᤧᤍᤣ᤹ᤖᤢᤀᤠᤱ ᤔᤧᤛᤧᤖᤢᤖᤥ॥”

ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤸᤗ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤀᤡᤰᤔᤛᤠᤒᤠᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ᤹ᤒᤣ᥅ 16 ᤂᤢᤏᤧ᤹ ᤋᤠᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤛᤧᤖᤢᤛᤡᤀᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤘᤣ᤹ ᤔᤏᤠᤜᤠ᤹ ᤐᤡᤖᤢᤛᤡ᤹ᤖᤥ॥”

ᤔᤏᤠᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤔᤧᤒᤠ᤺ᤳᤋᤢ. “ᤀᤠᤵᤑᤠᤸᤗᤧᤀᤠᤱ ᤀᤰᤂᤣ ᤔᤧᤒᤥ᤺ᤱᤅᤡᤸᤗᤖᤥ॥” 17 ᤕᤧᤛᤢᤖᤧ ᤂᤧᤱᤜᤠ᤹ ᤀᤍᤰᤋᤰᤁᤠᤱ ᤀᤥᤔᤧᤳᤋᤢᤛᤡᤖ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤁᤴ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠᤴ ᤌᤧᤔᤠᤒᤣ᥅

19 ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤧᤛᤢ᤺ᤴ ᤒᤠ ᤂᤧᤵᤔᤥᤀᤣ ᤋᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤂᤧᤍᤠ᤹ᤀᤥ ᤑᤧᤴ ᤀᤡᤰᤔᤛᤠᤒᤠᤜᤠ᤹ᤏᤢ ᤋᤱᤄᤢᤛᤡᤒᤠᤴ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥ᤺ᤛᤢ. ᤁᤖ ᤔᤏᤠᤜᤠ᤹ ᤔᤧᤃᤡᤖᤢᤛᤡ॥ 20 ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤋᤧᤶᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤔᤧᤜᤣ᤺ᤰᤋᤢ॥ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤕᤠᤱ ᤔᤧᤒᤡᤖᤢᤛᤡᤀᤠᤱ ᤛᤠᤶᤕᤥᤏᤡᤒᤠ ᤔᤧᤗᤧᤱᤛᤡᤱᤅᤠᤱ ᤕᤧᤛᤢᤖᤧ ᤁᤢᤎᤥ᤺ᤶᤛᤧ ᤔᤧᤒᤠᤱᤄᤢᤛᤡ॥ ᤂᤧᤱᤜᤠ᤹ᤖᤧ ᤁᤢᤒᤠ᤺ᤴᤏᤥ ᤋᤧᤶᤔᤠᤀᤠᤱ ᤖᤥᤔᤡ ᤕᤢᤰᤛᤠᤒᤠᤜᤠ᤹ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ ᤐᤡᤔᤠᤛᤡ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤖᤥ॥ 21 ᤂᤧᤱᤜᤠ᤹ᤖᤧ ᤕᤧᤛᤢ᤺ᤴ ᤁᤢᤒᤠ᤺ᤴᤏᤥ ᤌᤠ᤺ᤔᤠ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤛᤧᤰᤂᤠᤛᤠᤱ ᤂᤧᤏᤧ᤹ᤃ ᤁᤢᤍᤥ᤺ᤵᤔᤠ ᤐᤠ᤺ᤴᤗᤰ ᤁᤧᤒᤠ᤺ᤳᤋᤢ᤹. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠᤖᤰ ᤁᤧᤜᤢ᤹ᤖᤢᤛᤡ᤹॥ ᤂᤧᤏᤧ᤹ᤃ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤁᤧᤴᤇᤧᤴᤍᤢᤴᤇᤡᤴ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤛᤧᤰᤂᤠᤀᤣ ᤁᤧᤜᤢ᤹ᤖᤢᤛᤡᤖᤥ॥ 22 ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤡᤴ ᤀᤠᤔᤧᤳᤋᤧ᤹–ᤖᤥᤔᤡ ᤐᤕᤶ ᤜᤠᤱ ᤛᤡᤈᤖᤧᤴ ᤀᤣ᤺ᤱᤕᤠᤱ ᤜᤢᤱᤔᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤀᤠᤶᤒᤡᤏᤧᤴᤒᤡ᥅”

23 ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡ᤺ᤛᤢᤀᤠᤱ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. 24 “ᤀᤡᤱᤃᤠ᤹ ᤕᤠᤱᤀᤡᤳᤇᤡ᤺ᤴ ᤀᤥᤛᤣ᤺ᤴᤀᤠᤎᤠᤰᤋᤧᤶᤔᤧ᤹॥ ᤁᤵᤔᤥ ᤜᤠ᤺ᤳᤗᤧ ᤁᤢᤀᤡᤳᤇᤠᤵ ᤏᤢ ᤁᤢᤒᤠ᤺ᤴᤛᤠᤵ ᤐᤵᤐᤣ᥅”

ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤈᤖᤧᤸᤗᤧᤴ ᤐᤳᤗᤥ॥”

25 ᤕᤧᤛᤢᤖᤧ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤛᤡᤈᤖᤗᤧ ᤁᤢᤒᤠ᤺ᤴᤜᤠ᤹ ᤛᤡᤈᤖᤧᤴ ᤐᤡᤖᤧᤶᤔᤧ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤐᤡᤖᤧᤶᤔᤧ᤹ᤀᤥ॥”

26 ᤔᤏᤠ ᤋᤃᤡ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤒᤠ᤺ᤴᤏᤥ ᤋᤧᤶᤔᤠ ᤔᤧᤴᤇᤢᤰᤋᤢᤴ॥ ᤕᤧᤛᤢᤖᤧ ᤐᤡᤖᤢᤛᤡᤒᤠ ᤏᤥᤃᤵᤐᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤛᤫᤠ᤺ᤳ ᤔᤧᤕᤢᤅᤧ॥

27 ᤜᤧᤰᤁᤩᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤜᤥ᤺ᤵ ᤗ᤹ᤖᤡᤰ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤁᤢᤓᤠ ᤛᤍᤢᤁᤡᤜᤠ᤹ ᤕᤧᤛᤢᤖᤥ ᤔᤧᤍᤩᤧᤀᤠᤱ 28 ᤛᤣ᤺ᤴᤔᤧᤍᤥᤛᤢ. “ᤛᤡᤰᤛᤠᤶᤒᤣ. ᤔᤥᤛᤠᤖᤧᤃ ᤀᤰᤂᤣᤗ᤹ᤖᤡᤰ ᤛᤠᤵᤋᤢ ᤀᤠᤒᤡᤖᤧᤀᤠᤱ ᤐᤳ–‘ᤀᤠᤳᤋᤡᤸᤗᤧ ᤁᤢᤶᤓᤢ᤹ᤀᤡᤴ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤡ᤹᤺. ᤂᤧᤸᤗᤧ ᤁᤢᤴᤛᤠ᤹ᤖᤧ ᤔᤣᤔᤣᤍᤢᤔᤠ ᤁᤢᤴᤏᤧ᤹ᤍᤪᤣᤔᤠᤴᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠᤀᤣ ᤐᤥ᤺ᤱ॥ ᤜᤧᤰᤁᤩᤠᤱ ᤁᤢᤶᤓᤢ᤹ᤖᤧ ᤁᤢᤗᤠᤃᤡ ᤛᤠᤃᤵᤔᤠ ᤐᤥ᤺ᤱᤗᤥ॥’* ᤛᤠᤶᤕᤥᤌᤡᤶ ᥈᥋.᥋ 29 ᤀᤠᤸᤗ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤘᤕᤧ॥ ᤋᤢᤶᤒᤠᤸᤗᤧ ᤔᤣ᤺ᤰᤂᤡᤶ ᤆᤥᤃᤢᤀᤠᤱ ᤁᤢᤛ᤻ᤛᤠ᤺ ᤁᤢᤀᤣ ᤔᤧᤴᤘᤠ᤹ᤀᤣ ᤛᤩᤧᤖᤥ॥ 30-31 ᤜᤧᤰᤁᤣᤗ᤹ᤖᤡᤰ ᤛᤖᤢᤶᤒᤠᤴ ᤏᤢ ᤕᤠᤱᤛᤖᤢᤶᤒᤠᤸᤗᤧᤀᤠᤱ ᤂᤢᤴᤇᤡ᤹ ᤏᤧ᤹ᤍᤪᤣᤔᤠᤴᤏᤢ ᤔᤣ᤺ᤰᤂᤡᤶ ᤆᤥᤃᤧᤳᤇᤢ. ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤧᤰᤁᤣᤀᤣ ᤁᤧᤖᤧᤰ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤏᤧ᤹ᤍᤪᤣᤔᤠᤴᤏᤢ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤛᤠᤔᤧᤴᤘᤠ᤹ᤀᤣ ᤔᤧᤛᤩᤧᤖᤥ॥ 32 ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧ᤹ᤍᤪᤣᤔᤠᤴᤏᤠᤱ ᤛᤩᤧᤖᤥ॥ 33 ᤀᤠᤸᤗ ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤱᤅᤡᤸᤗᤧ ᤀᤠᤳᤋᤡᤸᤗᤧ ᤁᤢᤔᤣ᤺ᤳ ᤐᤥ᤺ᤱᤒᤠᤒᤣ᥅ ᤂᤧᤴᤏᤢᤃ ᤏᤢᤛᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧᤀᤣ ᤔᤣ᤺ᤰᤂᤡᤶ ᤔᤧᤈᤥᤃᤢᤀᤠᤱ ᤔᤧᤘᤕᤧ॥”

34 ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ ᤁᤵᤔᤥᤖᤰ ᤔᤣ᤺ᤰᤂᤡᤶ ᤔᤧᤈᤥ᤺ᤰᤗᤥ॥ 35 ᤁᤖ ᤋᤠ᤺ᤴᤍᤡ ᤁᤧᤍᤠ᤺ᤒᤠ ᤕᤧᤶᤔᤥᤃ ᤜᤧᤰᤁᤣ ᤔᤧᤒᤥ᤺ᤱᤏᤧᤸᤗᤥ. ᤌᤣᤀᤠᤱᤓᤧᤸᤗᤧ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤗᤠ᤹ᤖᤢᤛᤡᤒᤠ ᤔᤏᤠᤜᤠ᤹ ᤔᤣ᤺ᤰᤂᤡᤶ ᤔᤧᤴᤈᤥ᤺ᤰᤏᤧᤴᤗᤥ॥ 36 ᤂᤧᤱᤜᤠ᤹ᤃ ᤕᤠᤶᤔᤥ ᤔᤧᤴᤇᤡ᤺ᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡ᤺ᤰ ᤔᤧᤒᤥ᤺ᤱᤗᤥ॥ ᤂᤧᤱᤜᤠ᤹ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤛᤡᤖᤥ॥ 37 ᤜᤧᤰᤁᤣᤗ᤹ᤖᤡᤰ ᤁᤧᤛᤡ᤺ᤒᤠᤜᤠ᤹ ᤔᤧᤜᤡᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤡ ᤁᤧᤍᤡ᤺ᤵᤐᤠ ᤐᤥ᤺ᤰᤗᤠᤀᤥᤒᤠ ᤜᤡᤴᤍᤥ᤺ᤰᤁᤥ ᤔᤥᤛᤠᤖᤧ ᤀᤥᤛᤣ᤺ᤴᤀᤠᤎᤠᤰᤗᤥ॥* ᤗᤠᤶᤍᤡ᤺ᤰ ᥉.᥌ ᤔᤥᤛᤠᤖᤧ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤜᤘᤣ ᤍᤠᤱᤒᤠᤀᤣ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥ 38 ᤂᤧᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ᤃ ᤁᤢᤛᤡᤘᤧᤳᤜᤠ᤹ᤖᤧᤴ ᤔᤧ᤺ᤴ. ᤁᤖ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤗᤠᤃᤡᤃ ᤁᤧᤖᤧᤰ ᤁᤢᤜᤡᤱᤘᤧᤳᤋᤣ ᤔᤧᤘᤠ᤹ᤖᤥ॥”

39 ᤜᤧᤰᤁᤩᤠᤱ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ᤃ ᤛᤠ᤹ᤖᤡᤰ ᤏᤢ᤺ᤖᤡᤰᤁᤠᤱ ᤕᤠᤵᤔᤡ ᤁᤧᤔᤧᤳᤋᤧᤖᤥ॥” 40 ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤧ᤹ ᤐᤠ᤺ᤴ ᤛᤣ᤺ᤴᤍᤥ᤺ᤔᤠ ᤀᤠ᤺ᤴᤇᤡᤱᤔᤠᤀᤠᤱ ᤔᤧᤴᤇᤢᤰᤋᤢᤴᤗᤥ॥

41 ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ᤺ᤖᤥ ᤑᤠ᤹ᤀᤠᤱ ᤔᤧᤔᤧᤳᤋᤢᤒᤠᤒᤣ᥅” 42-43 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤗᤥ ᤛᤢᤶᤔᤥ ᤍᤠᤀᤢᤍᤖᤧ ᤀᤠᤒᤠᤅᤣ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ.

45 ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. 46 “ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤏᤢ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ᥄ ᤂᤧᤱᤜᤠ᤹ ᤁᤣ᤺ᤶᤒ᤻ ᤁᤣ᤺ᤶᤒᤠ ᤗᤃᤣᤵ ᤔᤧᤈᤠᤰᤂᤢᤀᤠᤱ ᤏᤠᤏᤢᤃᤳᤏᤠ ᤗᤠᤱᤔᤧᤄᤣ᤺ᤰᤗᤥ. ᤜᤧᤰᤁᤩᤠᤱ ᤐᤠᤱᤈᤢᤶ ᤗᤢᤶᤔᤥ ᤛᤣᤘᤠ ᤔᤧᤔᤧᤳᤋᤡᤃᤧᤖ ᤁᤧᤗ᤹ᤒᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤏᤢ ᤛᤠᤓᤠᤱᤈᤠᤀᤥ ᤋᤢᤶᤔᤩᤠᤱᤜᤠᤱ ᤕᤢᤰᤏᤠᤜᤠ᤹ᤀᤥ ᤕᤢᤱᤔᤠ ᤂᤢᤏᤡ᤹ ᤛᤡᤖᤠ᤹ ᤌᤠᤱᤗᤥ॥ 47 ᤂᤧᤱᤜᤠ᤹ᤖᤧ ᤔᤣᤔᤣᤍᤢᤔᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡᤀᤠᤱ ᤂᤢᤏᤡ᤹ ᤜᤡᤶᤎᤠ᤺ᤱᤜᤠ᤹ ᤔᤧᤗᤖᤢᤖᤥ. ᤁᤖ ᤏᤢ᤺ᤒᤠ ᤀᤥᤛᤣ᤺ᤴᤎᤠᤰᤛᤡᤱᤔᤠᤖᤧ ᤗᤠᤃᤡ ᤁᤣ᤺ᤶᤒ᤻ ᤁᤣ᤺ᤶᤒᤠ ᤋᤢᤘᤠ ᤔᤧᤈᤥᤃᤢ᤹॥ ᤂᤧᤱᤜᤠ᤹ᤖᤧᤃ ᤛᤧᤰᤂᤠᤀᤣ ᤛᤠᤰᤗ ᤂᤢᤶᤍᤡᤱ ᤔᤧᤄᤥ᤺ᤛᤢ᤹ᤖᤥ॥”