35
Dirava ena bese baine gini lou
1 Tano ḡaḡaena bona tano kaukauna bae moale;
tano ḡaḡaena baine moale, bona baine burea;
vahuvahu na heto 2 baine burea momo;
baine moale hisi dae mai ane iabina ida.
Lebanon hairaina bae henia,
Karamele bona Saron herea-daedia danu.
Idia ese Iehova hairaina bae itaia,
eda Dirava herea-daena bae itaia.
3 Ima manokadia ba hagoadadia;
tui manokadia ba ha-aukadia.
4 Kudoudia e hetahamu taudia ba hamaorodia, baoto:
Ba goada, basio gari!
A itaia, emui Dirava bainema,
mai dika davana ihenina ida,
Dirava ena dava ikarana ida;
ia na bainema, bena baine hamaurimui.
5 Una negana ai mata-kepulu taudia matadia na bae papa,
bona taia-kudima taudia taiadia na bae kirara;
6 una negana ai ae-hedairike tauna baine roho isi roho isi, dia na heto;
bona mu tauna malana ese moale anedia baine abi.
Badina be tano ḡaḡaena ai ranu baine lohi lohi dae,
bona tano kaukauna ai sinavai bae aru;
7 miri tanona mai siahuna na gohu ai bainela;
bona ranu-mase tanona na ranu lohi-lohi gabuna ai bainela;
uda sisiadia edia loa gabudia na gohugohu ai bae hahelao,
bona rei na geda bona siriho ese bae boloa.
8 Unuseni ai laolao dalana baine mia,
bona ladana bae hatoa “Dala Helaḡana”;
dia ḡoeva taudia ese basie rakalaia,
bona kavakava taudia na ia lalonai basie kerere.
9 Unuseni ai leona ta basine noho, bona
una dala ai kasiri aniani ḡauna daḡedaḡena ta basinela;
basie davaridia una gabu ai;
a vada e hamauridia taudia na unuseni ai bae raka.
10 Iehova ese vada e davalaidia taudia na bae lou mai,
Siona baema mai anedia ida;
moale hanaihanai na kwaradia ai baine mia,
moale bona lalo-namo bae abi,
bona lalo-hisihisi bona ḡanaḡana na bae ore.