13
1-2 Mehkoaros me kumwail nda, I rongehr mahs.
I wehwehki koaros; I pil wehwehki duwehte kumwail.
I sohte mihla pahmwail.
3 Ahpw I pahn akupwungiong Koht, kaidehk kumwail;
I men rapahki ei pwung pahn kupwure.
4 Kumwail kidimkihla amwail sawehwe kan likamw;
kumwail duwehte toahkte kan me sohte kak kamwahwihala aramas.
5 Kumwail dehr nda mehkot, pwe aramas en lemeleme me kumwail aramas loalokong kei!
6 Kumwail rong duwen ei pahn patohwanda ei repenpwung.
7 Dahme kumwail likilikamwki?
Kumwail lemeleme me amwail likamw akan pahn wia kamwahu ong Koht?
8 Kumwail songosong en doarehla?
Kumwail pahn lelki sapwellime repenpwung nan mwoalen kopwung?
9 Ma Koht pahn ketin kasawih kumwail, e pahn ketin diar mehkot mwahu rehmwail?
Kumwail lemeleme me kumwail kak pitih Koht duwehte amwail pitih aramas?
10 Mehnda ma amwail uhwong me rir,
ahpw e pahn ketin kapwungohng kumwail,
11 oh sapwellime manaman pahn kadirehkinkumwailla masepwehk kowahlap.
12 Amwail padahk kan soh katepe rasehng pehs;
amwail akupwung kan me luwet rasehng pwehl.
13 Kumwail nennenla oh mweidohng ie I en koasoi,
oh I nek pein dolung wahn ei koasoi kan.
14 I onopadahr I en pangala ei mour.
15 Solahr ei koapworopwor, eri ia duwen ma Koht pahn ketin kemeiehla?
I pahn kasalehda ei repengpwung pahn kupwure.
16 Mweinele met pahn doareiehla,
pwehki eh sohte aramas suwed men kak eimah mwohn silangin Koht.
17 Eri, kumwail rong ei pahn sakarada.
18 I onopadahr I en kasalehda ei repengpwung,
pwehki ei ese me ngehi me pwung.
19 Maing Koht, komwi pahn ketidohn kasalehda ei sapwung?
Ma komwi pahn ketin wia met, I onopadahr I en nennenla oh mehla.
20 Komwi ketin mweidohng ie I en peki soahngte riau; eri komwi ketin kupwure,
oh I sohte pahn song en rukusang komwi;
21 komwi ketin katokihedi omwi kalokei ie, oh dehr kauwehkiniehla masepwehk mwuledek.
22 Maing Koht, komwi ketin mahsen mahs, I ahpw pahn sapeng.
De mweidohng ie I en pato mahs, komwi ahpw ketin sapeng.
23 Ia dipei kan? Ia sapwung me I wiadahr?
Ia sapwung me I dipikidahr?
24 Dahme komwi ketin rirkihsang ie?
Dahme komwi ketin wiahkin ie imwintihti men?
25 Komwi songosong en kamasak ie? I rasehng tehndipw ieu;
komwi mahmahweniong tehndipw meng ieu.
26 Komwi ketin uhkihong ie kadip kapahtou laud kei,
pwehki dihp akan me I wiadahr ni ei pwulopwul.
27 Komwi ketin salihkidier nehi kan sel mete;
komwi kin ketin mwasamwasahn kahk koaros me I kin wia,
oh pil kin ketin kasawih lipwen nehi kan. Sohp 33.11.
28 Pwehki met, I ahpw ohkilahr rasehng lepin tuhke mwoasoangoat,
rasehng likou me loangenmwet kangalahr.