30
Ina-wawadikid-ogumaked-aila-soblegoed
(Éxodo 37:25-29)
1 Bab-Jehová Moisésʼga sogdebalid: “Deginbali, anga ina-wawadikid-ogumaked-aila be sobbaloed. Agi ina-wawadikid obupurmaklegegar.
We-aila-sobegala, urgomar-acaciaʼye-nugad be ebugoed.
2 We-aila, achabo-sugu imaklegoed,
e-matardungued, achabobar.
E-sugued, e-matardunguedbo emar-dungu guoed.
E-nibgueddi, dali-abala.
E-moli-bebegiid ailaba-mesa be soboed.
3 Birgi be or-nued nasikoed:
E-birgi-akinnar-maidgi,
bela e-dikarmargi,
e-moli-bebeyob-daklegedgi,
bela amargi, or be nasikoed.
E-dikarbali, ormar-mullu-ebirar be mesbaloed.
4 Deginbali, ormar-mullugalad-urba olua-bela-olobiid gwabo, e-dikarmargi be nasikoed,
adi, nabir suarmar-suitigwad egi dogega, aba nabir selegegar.
5 We-suarmar-suitigwad-imakega urgo-acaciaʼye-nugad be ebugoed.
Degine, we-suarmargi or egi be ebiris nasikoed.
6 ”Geb degine, ina-wawadikid-ogumakleged-aila sigoed, bia mor-dummad Dulemar-Anbo-Igar-Mesisad-Ulu-Eduged-Maid-Irwa nai, a-asabin, bia an bebo-abinguoe, agi be sioed.
7 ”Aarón bane-bane, wakudaryalaba, gwallumar guakwaa imakalile, ina-wawadikid-ogumakleged-ailagi anga ina-wawadikmalad ogumakoed. 8 Deginbali, neg-sedogusale, Aarón, sedo-gwallu-ogaalile, anga ina-wawadikidmalad ogumakbaloed. Degibi-sadegu, an-asabin be-wagan we-ina-wawadikidmalad obupurmakdii gudoed.
9 We anga-ina-wawadikmalad-ogumakleged-ailagi:
Ina-wawadikmalad-baid uklegosulid,
ibmar-durgan ogumaklegar uklegosurbalid,
degine, anga-ibmar-gwag-ukleged agi uklegosurbalid,
degine, a-birgi egi be ibmar eogosurbalid.
Unnila ina-wawadikidmaladbi be ogumakoed, an bega sogsadyob.
10 ”Aarón, birgagine, isgued-eliega, we-ina-wawadikmalad-ukleged-ailagi, e-moli-bebeyob-daklegedgi, anga-ibmar-ogumakar-uklesad-e-abe egi mage-mage imakoed. Birgagine, irgwennaa deyob imakoed. Be-wagan, degisadegu imakdii gudoed. We-aila angadga guoed.”
San-bendaklegega mani-ukleged
11 Bab-Jehová Moisésʼga sunmakdebalid, ega sogdebalid:
12 “Israel-dulemar be ebichidele, na san-bendakmalagala, wala-walagwen an-bennukmaloed. Ebichilesadba bennukmaloed, adi, melle bemargi boni-dummagan ainiegar.
13 ”Bela dulemar-ebislesmalad mani-gramo-atar (5) bennukoed: We-mani anse-goled-neggi-mani-aidikued-wilub-negabar gued.
”We-mani anga ibmar-uklegedga guoed. 14 Bela dulemar-birga-dulagwen-nikamalad (20), degi, bela aba-obine-birga-nikamalad-ebislesmaladi, anga we-mani ukoed.
15 ”Dulemar, na san-bendakmalaga anga mani-ukarmalale, dule-mani-ibed mani gwen-obine ukosulid. Dule-wileged gwen mani-ichee ukosurmogad. Anga we-mani ukarmalar, bela mani-gramo-atar ukmaloed. 16 Degisoggu, be-sunnagwad be Israel-dulemar-we-mani-ukarmalar, be suoed. Geb a-mani, dulemar-anbo-ambikued-neggi-arbalegega-ebulegega be ukoed.
”Weyobi, an insaegalad, Israel-dulemar na e-san-onogegala, a-anar mani uksamarye.”
Dii-sied-esgoro-gordikidbiid
17 Bab-Jehová Moisésʼga sogdebalid:
18 “Deginbali, dii-sied esgoro-gordikidbi be soboed.
E-sigedga-guoedi, esgoro-gordikidbi be imakoed.
A-dii-sied argan-enukega-ebulegega be imakoed.
We-dii-sied be sioedi, dulemar-anbo-ambikued-neg-siid, degi, anga-ibmar-ogumakar-ukleged-aila-siid, amar-imbagi be sioed.
Geb egi be dii enogoed.
19 A-diigi, Aarón, e-masmalamala, e-arganmar, degi, e-malimar, enukmaloed.
20 Wemala, dulemar-anbo-ambikued-neggi-dogdedibe,
degi, anga-ibmar-ogumakar-ukleged-ailase warmaknadele,
21 e-arganmar, degi, e-malimar enukmaloed.
Ar degi-imaksulile, burgwemaloed.
We degisadegu, weyob Aarónʼga, degi, e-waganga we-Igar maigu guoed.”
Olivo-gwallu, degi, ina-nuegan-yeer-yapanmalad
(Éxodo 37:29)
22 Bab-Jehová Moisésʼga sogdebalid:
23 “Ina-nuegan-yeer-yapanmalad be suo:
Mirraʼye-nugad-diregwad, nibirambe-gakapaa (13).
Canelaʼye-nugad-yeer-yapanned, nibirnergwa-abala (6½).
Cálamoʼye-nugad-yeer-yapanned, nibirnergwa-abala (6½).
24 Casiaʼye-nugad, nibirambe-gakapaa (13),
degi, olivo-gwallu, galón-gwagwen.
Anse-goled-neggi ibmar-oaidikued-wilubsiidgi be wilubsaoed.
25 ”We-inamar olivo-gwalluba bela be oburoed, anga olivo-gwallu-wawadikidga guegar. We-gwallu-wawadikid be imakoedi, dule-gwallu-wawadikid-imakdaedyob be imakoed. We-gwallu-wawad angadga guoed. 26 We-gwallu-wawadgine be wemar magoed:
Dulemar-anbo-ambikued-neg,
Dulemar-Anbo-Igar-Mesisad-Ulu,
27 mese, degi, bela eba-ibmarmar-ebulemalad,
gwallu-sied, degi, bela eba-ibmarmar-ebulemalad,
ina-wawadikmalad-ogumakleged-aila.
28 Anga-ibmar-ogumakar-ukleged-aila,
degi, bela eba-ibmarmar-ebulemalad,
degine, dii-sied esgoro-gordikidgi-sobaled, bela e-malise-bakar.
Amar bela we-gwallu-wawadgine be magoed.
29 ”Weyobi anga-ibmar-uklegaledga guoed. Bela we-ibmarmala angadgarbi guoed. Ibu-ibmar we-ibmarmar-ebusale, bela angadgarbi gunonimogoed.
30 ”Deginbali, Aarónʼgi, degi, e-masmalagi, be we-gwallu-wawad eogoed, adi, anga dule-irwa-anse-gormaladga gumalagar. 31 Israel-dulemarga be sunmakoed, ega be sogoed: ‘We gwallu-wawad, degisadegu, gwallu-wawa-eoleged-islidikidga guoye. 32 We-gwallu-wawad dule-bamaladgi eolegosulid, degine, we-gwallu-wawad-imakaledyobi, baid-gwallu-wawad be imakosulid. We-gwallu-wawad, gwallu-wawad-islidikidid. Degisoggu, gwallu-wawad angadgarbi-gued be dako.
33 ” ’Ar doa-dule, we-gwallu-wawad-imakaledyob baid-gwallu-wawad-imaksale, dulemar-irwa-anse-goledsulidgi eosdibe, e-dulemar-abargi ononnolegoed.’ ”
Ina-wawadikid ogumakega ukleged
34 Degine, Bab-Jehová Moisésʼga sogdebalid:
“We-gagan-yeer-yapanmalad-e-gichi be weo:
Estacteʼye-nugad-e-gichi,
ámbarʼye-nugad-e-gichi,
gálbanoʼye-nugad-e-gichi,
ina-wawadikid-incienso-nued.
We-gagan-yeer-yapanmalad-e-gichi bela emarbi-mergu be weo.
35 ”Bela-we-gagan-yeer-yapanmalad-e-gichi be oburoed. Igi ina-wawadikid-sobed-dule ina-wawadikid sobe, deyob be ina-wawadikid-inciensoʼye-nugad be soboed. Gagan-yeer-yapanmaladi ise-nue-oburar be imakoed. Balu egi be mesbaloed. Baid-ibmar egi be oburosulid. We-ina-wawadikid-inciensoʼye-nugad, angadgarbi guoed. 36 We-ina-wawadikid bela ise-nagar, ise-ubimakar be imakoed. We-ina-wawadikid, Dulemar-Anbo-Igar-Mesisad-Ulu-siid-asabin, dulemar-anbo-ambikued-neggi be sioed. Agi, an bese magarogoed. We-ina-wawadikid bela-bela bemarga angadgarbi-ebulegega guoed. 37 We-ina-wawadikid be imakoedi, baid-ina-wawadikid weyob-oburale, be imakosulid. We-ina-wawadikid Bab-Jehováʼgadgarbi be dakoed.
38 ”Ar doa-dule weyob ina-wawadikid-e-yapanned-uega imakalile, we-dule, e-dulemar-abargi ononnolegoed.”