21
Nega-dulesulidgan-demar-dikarba-naidgi yoedse-ibmar-guoed
1 Bab-Dummad Isaíasʼga nega-dulesulidgan-demar-dikarba-naidgi-neg-guoedi oyosad:
Neguevʼba burwa-bipirmakaled-nanaedyobi,
dule-yar-sumalad nega-dulesulidganba-danikidi, bato modanikid.
2 Anga yeer-gangue negburgan oyolesad:
Dule-emar-yardakedi, dule-yardaked.
Dule-wiogedi, dule-wioged.
Elam-dulemar, ¡gwichigunae!
Media-dulemar, ¡oitonae!
Dule-wile-itogedba-bodimalad bar boega imaklegosulid.
3 A-ulale, an-abagan nunmakedba wawanmaked,
an nunmaked-dummad itoged.
Sior muu-neggi-ugakgunair abagan nunmakdaeyobi,
an nunmak itoged.
An dule-sunmaked-itogedi, suli-suli-ito an-imaked.
An ibmar-dakedi, dobed-dummad anga uked.
4 An aku-itogusad.
Dobedba an wanwan-itoged.
Sedogusale, negdambegwad an yeer-itodaenad.
Emide, aka gwayed anga uked.
5 Sorda-dummagan iba-ononanaid,
mas-bukidar gullenaid.
¡Sorda-dummagan, be guagwarmalo!
¡Be-sigu-abgamalad be nudakmala!
6 Ar Bab-Jehová anga weyob sogsad:
“Dule-nakuleged be ogwicho.
Bela-ibmar-dakoedi, bega-sogega be imako.
7 Moli-ur-bila-onomaladgi dulemar ebo-ebo moli-uayasuigan-birgi-sii-dani be dakalile,
igi dulemar ebo-ebo moli-yargan-muremalad-birgi-sii-dani be dakalile, yog-gollar be imako.”
8 Degi, dule-nakuleged binnasuli goted:
“Dummad, bane-bane nakuleged-neg-suid-niba an nakulegwisguad.
Mutikidbali, an nakulegwisguad. An bangusisulid.
9 ¡Be dake! Dulemar moli-ur-bila-onomaladgi danimalad,
ebo-ebo danimalad.”
Geb dule-gwensak binnasuli goted:
“¡Babilonia-neggwebur bergus!
¡Babilonia-neggwebur bela oitoles!
Bela ibmar-wilub-sobarmalad e-bab-dummadga-imakmalad napagi omileded.”
10 Geb Isaías sogded:
“Sordagan, ibmar-gwagyob napagi-omilede be gusmaladid.
Israel-e-Bab-Dummad-Jehová-Bela-Gangued-Nikad an-uayagwar anga we-ibmar-sogsadi, an bemarga sognaid.”
Edom-yala-yoedse-berguoedgi sunmaklesad
11 Isaías, Duma-yalagi neg-guoedgi iduakwaa sunmaksad:
Dule anse binnasuli Seir-neggwebur-akale goled:
“Nakuleged-dule, ¿sana neg-mutikid berguoe?
Nakuleged-dule, ¿sana neg-ibguoe?”
12 Geb an-abin sogded:
“Neg-ibgued omodani, neg-mutikgued omodanibar.
Ar be gannar anse egisbiele, gannar egisbalodo.
Gannar be anse egisbiele, gannar be anse dagodo.”
Arabiaʼgi-yoedse-neg-guoedgi sunmaklesad
13 Arabia-dulemargi iduakwaa sunmaklesad:
Dedánʼginmalad, danar-danar duurmakmadaed,
nega-dulesulidganba sapur-moodonaidgi ambikumalad.
14 Uku-uku-itodimalad-abin be ainimarsun,
ega be dii ukmarsun.
Tema-yarginmalad, dule-wakinmamaidga be mas ukmarsun.
15 Ar ade, es-suidgi-gwakialidba duurmakmamaid,
es-suid-daarmakaledgi-gwakialidba duurmakmamaid.
Ar ade, e-idu warsi yaa-gwichidgi-gwakialidba duurmakmamaid,
bila-onolegedgi-gwakialidba duurmakmamaid.
16 Ar Bab-Jehová weyob anga soged: “Birgagwensega, Cedar-yala-e-yeerdakleged an obelogoed. Igi dule-manigi-arbaed birgagi e-arbaed ega bergunonidae, deyobi an imakoed. 17 Dule-sigugi-urwemalad-bulegan-Cedarʼginmalad, napi-ichee durgumaloed.” Ar ade, Israel-dulemar-e-Bab-Dummad-Jehová deyob soged.