54
Bab-Jehová Israel-dulemar-sabgumaiguad
1 Bab-Jehová sogded:
“Be, omegwa-geg-baked, gwen be mimmi-nikudisulid, weligwaledba be binnasuli-gole.
Be, gwen-muu-neggi-boniba-galitodisulid, binnasuli be namake.
¡Weligwaledba be binnasuli-gole!
Ar ani Bab-Jehová soged: Ome-wilesagudiid, bur bule ome-sui-nikadba mimmigan nikuoye.
2 ”Be-dordoneg-siidi, be odummo,
be-dordoneg-siidgi atued-dummagan-nanaid be egae.
¡Melle dobe-dobe be imako!
Dordoneg-e-dubamar be osugue,
e-dordoneg-bargamalad be ogannoge.
3 Ar be-argan-nuedsiki, degi, be-argan-sapiledsiki be nasgudoed.
Be-wagana yar-baigan suoed,
be-wagana neggweburmar-olloganagi ambikudoed.
4 ”Melle be dobe-itogo,
ar be bingeguosulid.
Melle be gwayo,
ar be-nug mesagwar guosulid.
Be yagwaunni bingegusadi be iegoed.
Bei-machered-burgwisgu, bingedar be itosadgi bar be binsaosulid.”
5 Ar Bab-be-obinnisadi, be-suiga gued.
A nugad: “Bab-Jehová-Bela-Gangued-Nikadye.”
Be-bendakedi, Israel-dulamar-e-Bab-Dummad-Isligwaledid.
A bilegoed: “Bela-napneg-naid-e-Bab-Dummadye.”
6 Be ome-wilesakwagudiidyob Bab-Jehová bese gornonikoed.
Ome-suli-suli-itodiidyob Bab-Jehová bese gornonikoed.
Igi ome dogdar yagwa-guedgi machered-nikusale, machered gannar metedae,
deyob gudiidgi Bab-Dummad bese gornonikoed.
7 Bab-Jehová-be-ollor-imakedi soged:
“Unnila sikwas an be-obachad.
Degi-inigwele, na bela-belad ulubgi wile-be-dakedgi gannar an be-abingaoed.
8 Unnila sikwas-sae-itogedgine, an be-idu bangusad.
Degi-inigwele, sabgued-degisadeguad-nikadgine, an wile be-dakoed.”
9 Bab-Dummad sogdebalid:
“Angardi Noé-ibaganyobi gued,
igi an Noéʼga ise-sogar sogsa gusa, muu-dummad bar napneggi murosurye.
Deyobi, an bega ise-sogar soged, bar an bebo urwosulid,
bar an iisedi bega ibmar sogosulid.”
10 Bab-Jehová-wile-be-dakedi soged:
“Amba yalamar-bukwad baidsik ainirye-sogele, degi, yar-mullugana giglimakdele, andi amba an be-sabedi gwen gwagosulid.
Anbo be igar-bogidikid-omesisadi, andi obelogosulid.”
11 Bab-Jehová-soged:
“¡Be dake! Neggwebur-nue-wilesagwa, burwa-dummadba oitolesad.
Dule a-neggwebur baisur-itogega-imaked sated.
¡Akwa-nuegan-yeerdaklemaladgi an be-soboed!
Akwamar-zafiros-birgi an be-sioed.
12 Be-galu-matusulid-birgine, an akwa-rubí-nuegan e-bargaedga mesoed.
Be-yawagakmar akwa-gargemalad-gaemaladgi an soboed.
Degi, bela be-galu-matusurmalad, akwa-gargemaladgi an soboed.
13 Ani Bab-Jehová, bela be-mimmigan odurdakoed,
be-mimmigan gwage-bogidikid nika gudii guoed.
14 Igar-napiragwadi gannarbaa an be-imakoed.
Mesagwar-gudii bar be itogosulid.
Bali dobee be itogosulid.
Begine, gwayed-dummadi bangudoed, gwen be-walikaa guosulid.
15 Dule begi gwichigualile, an eba-nai guosulid,
dulemar-yogasaar begi gwichiguarmalale, bese galakudmaloed.
16 ”Ani an dule-esgoro-sobed-soo-oduurmakedi obinnisad.
We-dule, na bilagi-ibmar-ebulemalad sobed.
Ani an dule-emar-obeloged obinnisbalid,
adi, bela dule-obelogegar.
17 Dule begi-nakwega, bila-onogedgi-ibmar-ebuleged-yeer-ganguedi, gwen begi obinosulid.
Dulemar begi yogasaar-sunmakmaladi, boo-sigega be imakoed.
We-ibmarmala anga-arbadimaladga an ukoed.
Angine, igar-innikigwad danikid.”
Deyobi, Bab-Jehová soged.